ვიცეპრემიერი: NDI-ის ქართველი პარტნიორები ყოველთვის სწორად არ ასახავენ რეალურ განწყობებს

„ეროვნულ დემოკრატიული ინსტიტუტის“ (NDI) კვლევის შედეგებს მთავრობის წარმომადგენლები და პარლამენტის ოპოზიციონერი წევრები გამოეხმაურნენ. 

ვიცეპრემიერ მაია ცქიტიშვილის განცხადებით, წლების განმავლობაში გამოჩნდა, რომ "NDI, IRI და სხვა ასეთი ტიპის ავტორიტეტული ინსტიტუციების ქართველი პარტნიორები ყოველთვის სწორად არ ასახავენ იმ რეალურ განწყობებს, რომელიც ადგილზეა". ამის შესახებ მაია ცქიტიშვილმა მთავრობის სხდომის დასრულების შემდეგ განაცხადა.

ვიცეპრემიერის თქმით, გარკვეულ პრობლემებს, რომლებიც NDI-ის კვლევაში იყო ჩამოთვლილი, ხელისუფლება თავად აყენებს: "იცით, რომ სიღარიბე არის ჩვენი გამოწვევა, ეკონომიკური მდგომარეობის გამოსწორება, ჩვენი მოსახლეობის დასაქმება და ასეთი ტიპის საკითხები არის ჩვენი ძირითადი გამოწვევები და ჩვენი ყოველდღიური საქმიანობა სწორედ იქითკენ არის მიმართული, რომ ისინი გადავლახოთ. არ დავეთანხმები იმ შეფასებას, რომ მთავრობის მუშაობა არის უარყოფითად შეფასებული, ჩვენ, უპირველესად, საკუთარ თავს ვთხოვთ მეტს ყოველდღიურ რეჟიმში. ვიცით, რომ მოსახლეობის მოთხოვნაც ხელისუფლების და მთავრობის მიმართ იზრდება და პირველ რიგში, ჩვენ თვითონვე ვუწყობთ ხელს იმას, რომ მოსახლეობა უფრო მეტად აკონტროლებდეს და სთხოვდეს ხელისუფლებას", - განაცხადა მაია ცქიტიშვილმა.

გარემოს დაცვისა და სოფლის მეურნეობის მინისტრის ლევან დავითაშვილის შეფასებით, მთავრობამ უნდა მოახერხოს მის მიერ გაკეთებული საქმის მოსახლეობამდე სწორად მიტანა. 

"აქ არის ორი საკითხი: ერთი - ცალსახად ყველაფერი უნდა გავაკეთოთ, რომ ჩვენი გაკეთებული საქმის სწორად მიტანა მოვახერხოთ მოსახლეობამდე, რათა აღქმები იყოს ადეკვატური. ეს არ არის მარტივი გამოწვევა, იცით, რომ კონკურენტულ პოლიტიკურ გარემოში არსებობენ ძალები, რომლებიც იქნებიან დაინტერესებული საწინააღმდეგოში; მეორე - NDI-ის კვლევებში ცდომილება ძალიან ბევრჯერ და ძალიან ხშირად დამტკიცდა. წინა წლებშიც, მათი შეფასებები არ გამართლდა რეალურ ცხოვრებაში", - განაცხადა ლევან დავითაშვილმა. 

ოპოზიციიდან "ევროპული საქართველოს" წევრის, გიორგი კანდელაკის განცხადებით, ბოლო წლების განმავლობაში პარლამენტის მიერ მიღებულმა კანონებმა და რეგულაციებმა ხალხის მდგომარეობა გაართულა და გააუარესა. სწორედ ამით ხსნის კანდელაკი კვლევის შედეგების იმ ნაწილს, რომელშიც პარლამენტის საქმიანობას გამოკითხული მოსახლეობის 32% ცუდად აფასებს.

"საბანკო რეგულაციები, ვითომ საპენსიო რეფორმა, რითაც ჯიბეში ჩაუძვრა ღარიბ მოქალაქეებს ჩვენი მთავრობა, სუბსიდიები და სხვა ათასგვარი მავნებლობა, ყველაფერი პარლამენტმა მიიღო, ვგულისხმობ უმრავლესობას. ცხადია, ჩვენ ყველაფრის წინააღმდეგ მივეცით ხმა, ამიტომ რა გასაკვირია, რომ ხალხი იმ ინსტიტუციას, რომელმაც მისი ცხოვრება გაართულა და გაჭირვება გაზარდა, ნდობას ვერ გამოუცხადებს", - განაცხადა გიორგი კანდელაკმა. 

კვლევა 2019 წლის 13-29 ივლისის პერიოდში, საქართველოს მასშტაბით 2131 პირისპირი ინტერვიუს წარმომადგენლობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარი არის 1,7%. NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით და ატარებს CRRC საქართველო.

NDI-მ საზოგადოებრივი აზრის კვლევის შედეგების პირველი  ნაწილი 17 სექტემბერს გამოაქვეყნა.