საქალაქო სასამართლოსთან „სირცხვილიას“ საპროტესტო აქცია გაიმართა

თბილისის საქალაქო სასამართლოსთან მოძრაობა „სირცხვილიას“ წარმომადგენლებმა საპროტესტო აქცია გამართეს. მათ 20 ივნისს დაკავებულებს მხარდაჭერა გამოუცხადეს და თქვეს, რომ მათ მიმართ ქვეყანაში შერჩევითი სამართალი მოქმედებს.

ამის მაგალითად აქციის მონაწილეებმა კი 20 ივნისის საქმეზე დაკავებული სპეცრაზმელის გირაოს სანაცვლოდ  გათავისუფლებას ასახელებენ. აქციის მონაწილეები რუსთაველის გამზირზე განვითარებული მოვლენების დროს დაკავებულების დაუყოვნებლივ გათავისუფლებას ითხოვენ.

„ჩვენი ვალია, რომ ამ უსამართლო და უსინდისო ხელისუფლების გადაწყვეტილებებს ყოველ ჯერზე მოჰყვეს პროტესტი. ეს უსამართლობა დაასრულებს ხელისუფლებას, იმიტომ რომ ასეთი უსამართლო გადაწყვეტილებების ხელისუფლებაში დარჩენა შეუძლებელია“, - განაცხადა „ევროპული საქართველოს“ წევრმა ელენე ხოშტარიამ.

კრიტიკას არ იზიარებენ მმართველ გუნდში. „ქართული ოცნების“ წარმომადგენლები აცხადებენ, რომ ქვეყანაში შერჩევითი სამართალი არ არსებობს და გადაწყვეტილებას მოსამართლე ინდივიდუალურად, საქმეში არსებული გარემოებების გათვალისწინებით იღებს.

„ჩვენ გვაქვს იმ სტანდარტის მართლმსაჯულება, რომელიც უზრუნველყოფს ერთიან მიდგომას ყველა ბრალდებულის მიმართ. თითოეული გადაწყვეტილება ნაკარნახევია დანაშაულის სიმძიმის, ბრალდებულის ჯანმრთელობის მდგომარეობით ან ამ გარემოაბათა კომბინაციით, შესაბამისად, ამ კითხვებს სათანადო პასუხები გაეცემა“, - აცხადებს რეგიონული განვითარებისა და ინფრასტრუქტურის მინისტრი მაია ცქიტიშვილი.

„ამ ტიპის გადაწყვეტილებებს იღებს სასამართლო. შესაბამისად, თუ ვინმეს აქვს კითხვები, განმარტებები შესაძლებელია მხოლოდ სასამართლომ გააკეთოს. როდესაც გათავისუფლებაზე მიდის საუბარი, გათავისუფლება არის საკმაოდ პირობითი სიტყვა, სინამდვილეში ეს არის აღკვეთი ღონისძიების შეცვლა. ეს არ ნიშნავს, რომ სპეცრაზმელის მიმართ გამოძიება შეწყვეტილია“, - აღნიშნა პარლამენტის თავმჯდომარემ არჩილ თალაკვაძემ.

27 სექტემბერს თბილისის საქალაქო სასამართლომ შსს-ს განსაკუთრებულ დავალებათა დეპარტამენტის თანამშრომელს ლევან იმერლიშვილს აღკვეთის ღონისძიების სახით გამოყენებული პატიმრობა გირაოთი შეუცვალა. 

20 ივნისს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად, საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი მხედველობა დაკარგა. 

რუსთაველის გამზირზე საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.