ჟენევის დისკუსიებზე კარასინის შემცვლელის ვინაობა ცნობილია

ჟენევაში საერთაშორისო დისკუსიების 49-ე რაუნდისთვის ემზადებიან. დღეს ტექნიკური ხასიათის შეხვედრები გაიმართება. დღის წესრიგში ტრადიციულად რუსეთის მხრიდან ცეცხლის შეწყვეტის შესახებ 2008 წელს დადებული ხელშეკრულების უპირობოდ შესრულება დგას. ასევე სასაუბრო თემებს შორის კვლავ იქნება გადაადგილების შეზღუდვა და ადამიანის უფლებათა უხეში დარღვევის ფაქტები. 

მოლაპარაკებები პირველად იმართება მას შემდეგ, რაც აშშ-ში ერთმანეთს რუსეთისა და საქართველოს საგარეო უწყებების ხელმძღვანელები შეხვდნენ. საერთაშორისო პარტნიორები კვლავაც მოუწოდებენ რუსეთის ფედერაციას, რომ მოსკოვმა კონსტრუქციული როლი შეასრულოს და გადაიდგას ნაბიჯები პრობლემების მოგვარებისკენ. დისკუსიების 48-ე რაუნდის დროს მხარეები ვერც ერთ საკითხზე ვერ შეთანხმდნენ. 

„უმთავრესი პრობლემა, რომელიც ადგილობრივ მოსახლეობას აწუხებს, ე.წ. გადასასვლელების ჩაკეტვაა. განიხილება დევნილთა დაბრუნების თემაც. პირველ სამუშაო ჯგუფში აუცილებლად დადგება სოფელ ჩორჩანაში განვითარებული მოვლენების საკითხი. ყველა საკითხზე ველოდებით კონსტრუქციულ გარემოს და იმედი გვაქვს, რომ გადაწყვეტილებები ადგილობრივი მოსახლეობის სასარგებლოდ იქნება მიღებული“, - აცხადებს აფხაზეთის ავტონომიური რესპუბლიკის, ყოფილი სამხრეთ ოსეთის ოლქის საკითხთა დეპარტამენტის უფროსი ზვიად ზვიადაძე.

ცვლილებებია რუსეთის ფედერაციის დელეგაციაში. 11 წლის განმავლობაში ჟენევაში მოსკოვის მხრიდან მთავარი მომლაპარაკებელი საგარეო საქმეთა მინისტრის მოადგილე გრიგორი კარასინი იყო. 19 სექტემბერს ის ამ თანამდებობაზე ანდრეი რუდენკომ ჩაანაცვლა. კარასინი კი კარიერას ფედერაციის საბჭოში, სახალინის ოლქის სენატორად გააგრძელებს.