კალაძე: ხაზარაძემ ისე დაიწყო პოლიტიკაში შემოსვლა, როგორც ბურჭულაძემ დაამთავრა

შემიძლია, შევადარო: როგორც პაატა ბურჭულაძემ დაამთავრა, ხაზარაძემ ისე დაიწყო პოლიტიკაში შემოსვლა- ა ს ე უპასუხა კახა კალაძემ „ლელოს“ დამფუძნებლის, მამუკა ხაზარაძის მიერ „პროგრეს ბანკთან“ დაკავშირებით გამოთქმულ ბრალდებებს.

 მისი თქმით, ის ყოველთვის ცდილობდა ხაზარაძის პოლიტიკაში შემოსვლა დადებითი კუთხით შეეფასებინა, რადგან ქვეყანას სჭირდება ჯანსაღი ოპოზიცია, თუმცა, მამუკა ხაზარაძემ ობიექტურ კრიტიკას ტყუილები და ცილისწამება არჩია.

„ზუსტად „ნაციონალური მოძრაობის“ ნარატივში ჯდება დააბრალე სხვას ის, რასაც აფუჭებ შენ. აი, ეს არის რეალობა. რაც შეეხება „პროგრეს ბანკს“, ბიძინა ივანიშვილის შემოსვლა ბანკში განპირობებული იყო, მხოლოდ და მხოლოდ, ერთი მოტივით, რომ გადაერჩინა ბანკი იმ თაღლიღებისა და მოძალადეებისგან, რომელსაც სააკაშვილის რეჟიმი წარმოადგენდა. როდესაც მე მივიღე გადაწყვეტილება პოლიტიკაში შემოსვლასთან დაკავშირებით, ორად ორი ბანკი იყო, „ქართუ“ და „პროგრეს ბანკი“, რომელსაც ყველანაირი აკრძალული მეთოდით ებრძოდნენ. სცადეს მისი გაკოტრება, იმ ადამიანების დაშინება, ვისაც კრედიტებით ვემსახურებოდით. ერთადერთი მოტივი, რისთვისაც ბიძინა ივანიშვილმა 22%-იანი წილი შეიძინა და რამდენიმე მილიონი გადაიხადა, იყო ბანკის გადარჩენა და ეს მართლაც ასე მოხდა. ბანკთან მას სხვა შეხება საერთოდ არ ჰქონია. ახლა ჩვენ ვისმენთ ამ ბრალდებებს. მარტივად შემიძლია ვთქვა, „თიბისი ბანკის“ მმართველები ფულის გათეთრებაში არიან ბრალდებულები, ამ ლოგიკით რატომ უნდა მივუდგეთ მაგალითად, სხვა აქციონერებს? იგივე უნდა მოვთხოვოთ, მაგალითად, EBRD-ის და იგივე პრეტენზია უნდა იყოს მასთან"- განაცხადა კალაძემ.

თბილისის მერის თქმით, „პროგრეს ბანკი“ გათეთრებასთან არ ყოფილა დაკავშირებული.

„თეორიულადაც რომ წარმოვიდგინოთ, ვთქვათ, ამ ბანკმა რაღაცები, მართლაც, გადარიცხა, რა შუაშია საერთოდ ბიძინა ივანიშვილი? საოცრებაა ის განცხადებები, რომელსაც ხაზარაძის მხრიდან ვისმენთ. ეს ადამიანი პოლიტიკაში შემოსვლიდან საოცარ განცხადებებს აკეთებს. შედარებებსაც აკეთებენ პაატა ბურჭულაძესთან, მაგრამ მცდარია ეს შედარებები. როდესაც ახალი პოლიტიკოსი შემოვიდა, ვიფიქრე რომ ეს ჩვენი ქვეყნისთვის, პოლიტიკური სივრცისთვის მისასალმებელი იყო. სამწუხაროდ, სიცრუე, სიყალბე ბევრ პოლიტიკოსს სჩვევია საქართველოში, რაც ძალიან ცუდია და ქვეყნის განვითარებას უშლის ხელს, ზოგადად, პოლიტიკური სპექტრის ჩამოყალიბებას. ერთი შედარება შემიძლია გავაკეთო- როგორც პაატა ბურჭულაძემ დაამთავრა, ხაზარაძემ ისე დაიწყო პოლიტიკაში შემოსვლა. არ გიჩნდებათ კითხვები იმასთან დაკავშირებით, რომ მამუკა ხაზარაძეს 2 წლის მერე გაახსენდა, რომ, თურმე, ეგეთი ბანკი უყიდია. სამარცხვინოა ასეთი განცხადებები. მე შემრცხვებოდა მის ადგილზე, მაგრამ როგორ უნდა შერცხვეს ადამიანს, რომელსაც არც ნამუსი და არც ზნეობა გააჩნია",- განაცხადა კახა კალაძემ.

15 ოქტომბერს მამუკა ხაზარაძემ განაცხადა, რომ  „პროგრეს ბანკთან“ დაკავშირებით ბიძინა ივანიშვილის პროკურატურაში დაბარებას ელოდება.