ადვოკატი: პროკურატურამ ომბუდსმენს თოდაძის მასალების გადაცემაზე უარი უთხრა

თამთა თოდაძის ადვოკატის თამარ ლუკავას განცხადებით, პროკურატურამ სახალხო დამცველს თოდაძის მიმართ სავარაუდო სექსუალური და ფიზიკური ძალადობის საქმის მასალების გაცნობასა და გადაცემაზე უარი უთხრა. ამის შესახებ ადვოკატმა კავშირ „საფარის” ოფისში გამართულ პრესკონფერენციაზე განაცხადა.

ადვოკატის თქმით, პროკურატურას საქმის მასალების გადაცემაზე უარის მოტივი არ განუმარტავს. „სწორედ ამიტომ გაგვიჩნდა ეჭვი, რომ, სავარაუდოდ, რაღაც დასამალი აქვს პროკურატურას, რადგან ჩვეულებრივ გახმაურებულ საქმეებზე და არა მარტო გახმაურებულ საქმეებზე, ისეთებზეც, რომელსაც გრიფი ადევს, სახალხო დამცველს ჰქონდა წვდომა”, - განაცხადა თამარ ლუკავამ და დასძინა, რომ მისი დაცვის ქვეშ მყოფი თავიდანვე ითხოვდა საქმის გასაჯაროებას. 

ამ საკითხთან დაკავშირებით გენერალურმა პროკურატურამ განცხადება გაავრცელა, რომელშიც წერს, რომ სისხლის სამართლის საქმეზე მიმდინარეობს გამოძიება, შესაბამისი კანონის მიხედვით, კი შემაჯამებელი გადაწყვეტილების მიღებამდე პროკურატურა სახალხო დამცველის აპარატის წარმომადგენელს საქმის მასალებს ვერ გააცნობს:

„სახალხო დამცველის შესახებ ორგანობული კანონის მე-18 მუხლის "ე" ქვეპუნქტის თანახმად, საქართველოს სახალხო დამცველს უფლება აქვს, შემოწმების ჩატარებისას გაეცნოს სისხლის სამართლის , სამოქალაქო და ადმინისტრაციულ მხოლოდ იმ საქმეებს, რომლებზეც  მიღებული გადაწყვეტილებები კანონიერ ძალაშია შესული.

შესაბამისად, რადგან კანონმდებლობა სახალხო დამცველის მიმართ რაიმე საგამონაკლისო წესს არ ითვალისწინებს, მიმდინარე წლის 15 ოქტომბერს საქართველოს გენერალურმა პროკურატურამ სახალხო დამცველის აპარატს წერილობით აცნობა, რომ სისხლის სამართლის საქმეზე გამოძიება მიმდინარეობს, ხოლო „საქართველოს სახალხო დამცველის შესახებ“ საქართველოს ორგანული კანონის მე-18 მუხლის „ე“ ქვეპუნქტის საფუძველზე, შემაჯამებელი გადაწყვეტილების მიღებამდე პროკურატურა ვერ უზრუნველვყოფს სახალხო დამცველის აპარატის წარმომადგენლისთვის საქმის გაცნობას.
ამასთან, საქართველოს პროკურატურა კვლავ მზადყოფნას გამოთქვამს კანონის გათვალისწინებით   განაგრძოს სახალხო დამცველის საქმიანობის განხორციელების ხელშეწყობა. სახალხო დამცველის აპარატს, განსაკუთრებით ბოლო წლების განმავლობაში, დაუბრკოლებლად, ყოველგვარი შეზღუდვის გარეშე, შესაძლებლობა აქვს პროკურატურაში გაეცნოს იმ საქმეთა მასალებს, რომელთა ხელმისაწვდომობასაც მისთვის საქართველოს კანონმდებლობა განსაზღვრავს”, - წერია პროკურატურის განცხადებაში. 

23 ოქტომბერს სახალხო დამცველი თამთა თოდაძესა და მის ადვოკატს შეხვდა. ნინო ლომჯარიამ პროკურატურას მოუწოდა, საგამონაკლისო წესით დაუშვან აპარატისთვის სავარაუდო სექსუალური და ფიზიკური ძალადობის საქმის მასალებზე წვდომა. საუბარია საქმეზე, რომელზეც საკრებულოს დეპუტატი ილია ჯიშკარიანია ბრალდებული.

თბილისის საკრებულოში „ქართული ოცნების“ დეპუტატ ილია ჯიშკარიანს თანამშრომელი თამთა თოდაძე სექსუალურ და ფიზიკურ ძალადობაში ადანაშაულებს და ობიექტურ გამოძიებას ითხოვს. 

საქართველოს გენერალურმა პროკურატურამ თბილისის საკრებულოს დეპუტატ ილია ჯიშკარიანს ბრალი 8 ოქტომბერს წარუდგინა. ამასთან, გენერალურმა პროკურატურამ თამთა თოდაძე დაზარალებულად ცნო. 

ძალადობის სავარაუდო მსხვერპლის თქმით, ჯიშკარიანმა მასზე სექსუალური ძალადობა სცადა, შემდეგ კი ფიზიკურად იძალადა. საქმეზე გამოძიება სისხლის სამართლის კოდექსის სამი მუხლით მიმდინარეობს.