უგულავა მეუფე იაკობს საპარლამენტო ფორმატში საუბარს სთავაზობს

„ჩვენი სურვილია, მეუფე იაკობი მოვიწვიოთ პარლამენტში და მან საპარლამენტო ფორმატში მოყვეს ყველაფერი, რასაც თვლის საჭიროდ იმისათვის, რომ ნათელი მოეფინოს ამ ბურუსით მოცულ ისტორიას“, განაცხადა „ევროპული საქართველოს“ ერთ-ერთმა ლიდერმა პატრიარქის ქორეპისკოპოსის განცხადებებზე კომენტირებისას. 

„ყოველმხრივად ძალიან მძიმე მოსასმენი იყო ის, რაც ჩვენ მოვისმინეთ. ფაქტია, რომ ძალიან მძიმე ბრალდებები გაისმა, პროკურატურა კანონით არის მოვალე, საჯარო სივრცეში გაჟღერებულ კანონდარღვევაზე, რომელშიც საუბარია მკვლელობაზე თუ მოწამვლაზე, დაიწყოს მოკვლევა და საზოგადოებას გასცეს პასუხი. უფრო მეტიც, არშემდგარი მკვლელობის დაგეგმვაზე ამ ხელისუფლებას წინა ხელისუფლების რამდენიმე ძალოვანი პასუხისგებაში ჰყავს მიცემული. ამიტომ, თუ პროკურატურა არ გაინძრევა, აქ კიდევ ერთხელ გამოჩნდება ორმაგი სტანდარტი და ის, რომ ჩვენს ქვეყანაში შერჩევითი სამართალია.

სულ მცირე, სახეზე გვაქვს ის, რომ ხელისუფლება ცდილობდა ეკლესიის საქმეებში ჩარევას, ეს პირდაპირ კონსტიტუციის დარღვევაა იმიტომ, რომ კონსტიტუციის მიხედვით, ეკლესია და სახელმწიფო ერთმანეთისგან არის დაშორებული. პატრიარქის გადაყენების მცდელობა პირდაპირ შეიძლება, გახდეს საიმპიჩმენტო პროცედურის დაწყების საფუძველი“, - განაცხადა გიგი უგულავამ.

მისივე თქმით, „ეს არის ძალიან სენსიტიური საკითხი და საზოგადოებას აქვს ლეგიტიმური ინტერესი გაიგოს რაზეა საუბარი.

„ჩვენ გუშინვე ვხედავდით, რომ სახელისუფლებო ბოტები და ხელისუფლება ცდილობდა, აქცენტი გაეკეთებინათ იმაზე, რომ ის არაფხიზელ მდგომარეობაში იყო, რაც ჩემი აზრით, სრულიად უადგილოა. სასწორზე დევს ძალიან მნიშვნელოვანი საკითხი. შემიძლია ამაზე ბიბლიიდან ამბავი მოგიყვეთ, როდესაც თავის დროზე ნოეც დათვრა, მაგრამ ამას არ შეუშლია ხელი იმისთვის, რომ მას კიდობანი გაეკეთებინა და კაცობრიობა გადაერჩინა, ამიტომ მეუფეს მინდა ვთხოვო, მობრძანდით პარლამენტში, ჩვენ ოპოზიციური პარტიები და განსაკუთრებით „ევროპული საქართველო“ გიმასპინძლებთ, მოგცემთ ტრიბუნას და გთხოვთ, მოყევით ყველაფერი ის, რაც საზოგადოებამ უნდა იცოდეს“, - განაცხადა გიგი უგულავამ.

საქართველოს კათოლიკოს-პატრიარქის ქორეპისკოპოსმა, მეუფე იაკობმა ტელეკომპანია „პირველთან“ ინტერვიუში ისაუბრა ყოფილი პრემიერის, გიორგი კვირიკაშვილის კაბინეტში გამართულ შეხვედრაზე, რომელზეც მისი თქმით, „ეჩალიჩებოდნენ პატრიარქის გადაყენებაზე“. მისივე განცხადებით, სახელმწიფო უსაფრთხოების სამსახურის იმჟამინდელ უფროსთან, ვახტანგ გომელაურთან და გიორგი გახარიასთან ერთად შედგა ეს შეხვედრა.