მეუფე იაკობი: ივანიშვილის დავალებით პატრიარქის გადაყენებაზე მეჩალიჩებოდნენ

მეუფე იაკობის განცხადებით, „ყოფილი პრემიერმინისტრი გიორგი კვირიკაშვილი, სუს-ის ყოფილი უფროსი, ვახტანგ გომელაური და ეკონომიკის ყოფილი მინისტრი, გიორგი გახარია მას პატრიარქის გადაყენებაში დახმარებას სთხოვდნენ. მეუფე იაკობმა ტელეკომპანია „პირველის“ ეთერში თქვა, რომ შეხვედრა ყოფილი პრემიერის კაბინეტში შედგა.  

საქართველოს კათოლიკოს-პატრიარქის ქორეპისკოპოსმა, მეუფე იაკობმა სკანდალურ ინტერვიუში ხელისუფლება მწვავედ გააკრიტიკა და 2020 წლის არჩევნებში 25%-იანი მხარდაჭერის მოპოვებაც კითხვის ნიშნის ქვეშ დააყენა. მეუფე იაკობმა თქვა, რომ ვისაც პატრიარქის მკვლელობა უნდოდა, „ამას არავის აპატიებს“. ასევე ამბობს, რომ „ყველას გადაუვლის, ვინც ჭკვიანად არ იქნება“. 

მეუფე იაკობის განცხადებით, პატრიარქად მეუფე შიოს დანიშვნა სურდათ, მსგავსი შეხვედრები გაიმართა სხვა მეუფეებთანაც, ეს დავალება კი ბიძინა ივანიშვილმა ვანო ჩხარტიშვილთან შეხვედრის შემდეგ გასცა.

„კვირიკაშვილის დროს დამიძახეს შეხვედრაზე. კვირიკაშვილი იყო, ვახო გომელაური იყო და ცოტა დაგვიანებით მოვიდა გახარია. „მეჩალიჩებოდნენ“, ჩვენ გვინდა პატრიარქი გადავაყენოთო და შიო დავაყენოთ პატრიარქადო.

მე ვუთხარი: ბიჭო, თქვენ მაგას ვინ გეკითხებათ, ეკლესიამ თვითონ იცის და ცოცხალი პატრიარქის წინააღმდეგ როგორ მიდიხართ-მეთქი.

პირველი მე ვიყავი ამ შეხვედრაზე, მერე იყო მეუფე თეოდორე, მეუფე გრიგოლი და მეუფე პეტრე. მეუფე პეტრეს კვირიკაშვილი არ შეხვდა, შეხვდნენ გახარია და გომელაური. ვახო გომელაურს ყოველთვის წესიერი პოზიცია ეჭირა.

ყველას აწი მე მივხედავ. ბიძინა ამბობს ხოლმე, ვინ არის მეუფე, არავინ არ არისო. მე სინოდის ავტორიტეტული წევრი ვარ. მე ძლიერი პოზიციები მაქვს ეკლესიაში“, - განაცხადა მეუფე იაკობმა.

მეუფე იაკობმა ინტერვიუში ასევე თქვა, რომ აღნიშნული შესახებ პატრიარქსაც ესაუბრა.  

სასულიერო პირმა ინტერვიუში ისიც განაცხადა, რომ პროკურორები ირაკლი შოთაძე და ოთარ ფარცხალაძე ფულს სძალავდნენ და ამის შესახებ ინფორმირებული იყო ყოფილი პრემიერმინისტრი გიორგი კვირიკაშვილი. მეუფე იაკობი „მურუსიძის და ჩინჩალაძის მოშორებითაც“ დაიმუქრა.