მარგველაშვილს პატრიარქის წინააღმდეგ ხელისუფლების შეთქმულების არ სჯერა

საქართველოს ექსპრეზიდენტს გიორგი მარგველაშვილს პატრიარქ ილია მეორის წინააღმდეგ ხელისუფლების შეთქმულების არ სჯერა. როგორც მან „პალიტრანიუსის“ ეთერში განაცხადა, ეკლესიასა და სახელმწიფოს შორის რაიმე საკითხზე მოლაპარაკებები უკანონო არ არის და თავადაც ხშირად ხვდებოდა სასულიერო პირებს მინისტრობის დროს. 

გიორგი მარგველაშვილის თქმით, გიორგი გახარია, ვახტანგ გომელაური და გიორგი კვირიკაშვილი „არ იყვნენ უახლოესი თანამოაზრეები და მოკავშირეები ერთმანეთისთვის და ამ ვითარებაში წარმოგიდგენიათ, რომ რაიმე საჩოთირო საკითხზე პარტნიორობდნენ?“

„ასეთ შეხვედრაზე პოლიტიკოსი დადის მხოლოდ უახლოეს მოკავშირეებთან ერთად, კვირიკაშვილი არ წავიდოდა ისეთ შეხვედრაზე ამ პერსონებთან ერთად, რომელიც არ იქნებოდა სრულიად გამჭირვალე ჩარჩოებში. ვინც გიორგის იცნობს წარმოუდგენია, რომ მან რაიმე საკითხი შეიძლება წარმოშვას პატრიარქის ნების საწინააღმდეგოდ.

გამოვრიცხავ, რომ პატრიარქის გადაყენების საკითხში კვირიკაშვილი მონაწილეობდა.

ამ სახელმწიფოშიც ძალიან ბევრი რამ არის მოშლილი, მაგრამ ასე აბსოლიტურად გაუგებრად პრემიერმა, რომ თქვას მოდი ერთი დავჯდეთ და პატრიარქის გადადგომაზე დავილაპარაკოთო, ასეთი ანეგდოტიც არ არის ჩვენი ხელისუფლება. ინსტიტუციურად ძალიან ბევრი რამ მოიშალა, მოიშალა წესები, მოიშალა თვითონ იერეარქია ხელისუფლებაში და ყოველდღიურად ამ ყველაფრის ნგრევა მიმდინარეობს, მაგრამ ასეთი ანეკდოტიც არ არის, რომ მოდი, რომელიმე ეპისკოპოსს დავუძახოთ და პატრიარქის მოშორებაზე ვესაუბროთ,“ - განაცხადა გიორგი მარგველაშვილმა.

26 ოქტომბერს, მეუფე იაკობმა ტელეკომპანია „პირველის“ ეთერში თქვა, რომ ყოფილი პრემიერმინისტრი გიორგი კვირიკაშვილი, ვახტანგ გომელაური და გიორგი გახარია მას პატრიარქის გადაყენებაში დახმარებას სთხოვდნენ. 28 ოქტომბერს მეუფე იაკობმა პატრიარქის ქორეპისკოპოსის თანამდებობა დატოვა.