გენპროკურორი მეუფე იაკობის განცხადებაში დანაშაულის ნიშნებს ვერ ხედავს

საქართველოს გენერალური პროკურორის, შალვა თადუმაძის განცხადებით, მეუფე იაკობის განცხადებაში ის დანაშაულის ნიშნებს ვერ ხედავს, რადგან, როგორც გენპროკურორი განმარტავს, განცხადებაში მოყვანილი ინფორმაცია დროშია აცდენილი. ამის შესახებ თადუმაძემ ჟურნალისტებს განუცხადა. 

შალვა თადუმაძის თქმით, სამართალდამცავი ორგანოები გამოძიებას იწყებენ იმ განცხადების შესაბამისად, რომელიც მიმართულია საგამოძიებო ორგანოში ან სინამდვილის რაღაც ელემენტებს შეიცავს.

„დროში აცდენილია, რადგან მაღალი თანამდებობის პირებზეა, რომლებიც იმ დროს არ იყვნენ იმ თანამდებობებზე და მეორეც, დანაშაულის ნიშნების შემცველი განცხადება არ ყოფილა. აღნიშნულ განცხადებაში დანაშაულის ნიშნებს ვერ ვხედავ, გამომდინარე იქიდან, რომ მასში მოყვანილი ინფორმაციები დროში აცდენილია იმ მოვლენებთან, რომელზეც საუბარია. თუ არსებობს რამე კონკრეტული ფაქტები, ყველას, მათ შორის სასულიერო პირს უფლება აქვს მიმართოს სამართალდამცავ ორგანოებს, ჩამოაყალიბოს თავისი ერთიანი პოზიცია და სამართალდამცავი ორგანოები შესაბამის რეაგირებას მოახდენენ“, - განაცხადა თადუმაძემ.

გენერალურმა პროკურორმა კომენტარი გააკეთა მეუფე იაკობის განცხადებაზე ყოფილ გენპროკურორ ოთარ ფარცხალაძესთან დაკავშირებით. მეუფე იაკობმა „მთავარ არხთან“ თქვა, რომ ოთარ ფარცხალაძე და ბიზნესმენი უჩა მამაცაშვილი რეგიონული განვითარებისა ყოფილ მინისტრს, რამაზ ნიკოლაიშვილს ხელშეუხებლობისთვის 15 მილიონ დოლარს სთხოვდნენ.

„ინფორმაციაზე, რომელიც რეალობას არის მოკლებული, ბუნებრივია გამოძიება არ უნდა დაიწყოს. ეს კანონით არის განსაზღვრული. ამ სახის ინფორმაციაზე გამოძიება არასოდეს არც ერთ ქვეყანაში არ იწყება. შესაბამისად, არ უნდა დაიწყოს გამოძიება... არც ერთი მტკიცებულება არ არსებობს ამისი, არც ერთი ინფორმაცია არ არსებობს უტყუარი ამისი, შესაბამისად, გამოძიება ბოდვებზე ვერ დაიწყება“, - განაცხადა თადუმაძემ.

26 ოქტომბერს, მეუფე იაკობმა ტელეკომპანია „პირველის“ ეთერში თქვა, რომ ყოფილი პრემიერმინისტრი გიორგი კვირიკაშვილი, ვახტანგ გომელაური და გიორგი გახარია მას პატრიარქის გადაყენებაში დახმარებას სთხოვდნენ. 28 ოქტომბერს მეუფე იაკობმა პატრიარქის ქორეპისკოპოსის თანამდებობა დატოვა.