ევროსაბჭოს 3 მაისის გადაწყვეტილების გამო რუსეთი ჟენევის შეხვედრების გაუქმებაზე ალაპარაკდა

რუსეთის საგარეო საქმეთა სამინისტრო 3 მაისს ევროსაბჭოს მინისტრთა მოადგილეების კომიტეტის მიერ მიღებულ გადაწყვეტილებას საკუთარ ვებგვერდზე გამოეხმაურა. მოსკოვი დოკუმენტს ტენდენციურს უწოდებს და აცხადებს, რომ ფიქრობს, ღირს თუ არა ჟენევის შეხვედრების არსებულ ფორმატში გაგრძელება. 

საგარეო უწყება განმარტავს, რომ კომიტეტმა ეს “არაკონსესური“ გადაწყვეტილება, რომელიც ადრე თბილისის მიერ იყო “ჩასმული“, კენჭისყრით მიიღო:

“დოკუმენტი თავისი მიკერძოებულობით აბსურდამდე განსაცვიფრებელია და ცდება რეალობას. მასში დეკლარირებულია არარსებული აფხაზეთისა და სამხრეთ ოსეთის საქართველოსთვის მიკუთვნება. არის მცდელობა, რომ რუსეთს დაეკისროს პასუხისმგებლობა იმ კონფლიქტისთვის, რომელიც საქართველოს აქვს ამ რესპუბლიკებთან და რომლებიც არასოდეს შედიოდნენ საქართველოს შემადგენლობაში, ასევე ამ რესპუბლიკების შიგნით არსებულ ვითარებაზე. თბილისი, დასავლელი მფარველების მხარდაჭერით, განაგრძობს საერთაშორისო მოედნებზე ცრუ პროპაგანდას, რომლის ერთადერთი მიზანია მეზობლებთან არ ჰქონდეს ნორმალური ურთიერთობები. საქართველოს დელეგაცია სისტემატურად ამბობს უარს, კონსტრუქციულად ითანამშრომლოს ჟენევის დისკუსიებში ამიერკავკასიაში უსაფრთხოების საკითხებთან დაკავშირებით. ამ სიტუაციაში გვიწევს სერიოზულად დავფიქრდეთ არსებული ფორმატით ჟენევის შეხვედრების გაგრძელებაზე“ - ნათქვამია განცხადებაში.

3 მაისს ევროსაბჭოს მინისტრთა მოადგილეების კომიტეტის 1285-ე სხდომაზე, დღის წესრიგის საკითხის „ევროპის საბჭო და კონფლიქტი საქართველოში“ ფარგლებში, უპრეცენდენტო გადაწყვეტილება მიიღეს. 

დოკუმენტში პირველად დაფიქსირდა, რომ აფხაზეთსა და სამხრეთ ოსეთში შექმნილი ვითარება რუსეთის ფედერაციასა და საქართველოს შორის კონფლიქტია.