ცესკოს თანახმად საარჩევნო უბნებზე ამომრჩეველთა აქტივობა 50%-ზე მეტი იყო

ცესკოში შუალედურ არჩევნებთან დაკავშირებით ბრიფინგი გაიმართა. როგორც ცესკოს პრესსპიკერმა, ანა მიქელაძემ თქვა, 20:00 საათისთვის ამომრჩეველთა აქტივობამ ლაგოდეხის მუნიციპალიტეტის აფენის თემის 4 საარჩევნო უბანზე შეადგინა 57,06 %, რაც რაოდენობრივად 2413 ამომრჩეველია; 

ადიგენის მუნიციპალიტეტის არალის თემის 1 საარჩევნო უბანზე 60,5 %, რაც რაოდენობრივად 887 ამომრჩეველია, ხოლო მარტვილის მუნიციპალიტეტის კიწიის თემის 2 საარჩევნო უბანზე ამომრჩეველთა აქტივობამ შეადგინა 51,22 %, რაც რაოდენობრივად 565 ამომრჩეველია“, - განაცხადა ანა მიქელაძემ. მისივე თქმით, არჩევნების დღემ ყველა უბანზე ჩაიარა მშვიდ გარემოში და ამომრჩევლებს თავისუფლად შეეძლოთ მთელი დღის განმავლობაში საკუთარი ნების გამოხატვა. შესაბამისად, საარჩევნო უბნებზე არც ერთი საჩივარი არ დაწერილა.

ამ წუთებში საუბნო საარჩევნო კომისიებში მიმდინარეობს ხმის დათვლის პროცედურები. მას შემდეგ რაც შედგება საუბნო შემაჯამებელი ოქმები, საარჩევნო უბანზე კანონით გათვალისწინებული ყველა პროცედურის დასრულების შემდეგ, ისინი მიეწოდება შესაბამის საოლქო საარჩევნო კომისიებს, რომლებიც უმოკლეს ვადებში ატვირთავენ მათ საარჩევნო მართვის სპეციალურ ელექტრონულ პროგრამაში. თავის მხრივ, ცესკო საუბნო შემაჯამებელ ოქმებს მიღებისთანავე ეტაპობრივად განათავსებს სპეციალურ ვებგვერდზე www.results.cec.gov.ge. ასევე, წინასწარი შედეგები დაუყოვნებლივ იქნება განთავსებული ცესკოს ვებ გვერდზე და ხელმისაწვდომი იქნება ყველა დაინტერესებული მხარისთვის.

არჩევნები ტარდებოდა 7 საარჩევნო უბანზე, სადაც საერთო ჯამში 6 798 ამომრჩეველია რეგისტრირებული. არჩევნებში სამი საარჩევნო სუბიექტის მიერ წარდგენილი 5 კანდიდატი მონაწილეობდა.

არჩევნებს 10 ადგილობრივი სადამკვირვებლო ორგანიზაციის 76 და 1 საერთაშორისო ორგანიზაციის 5 დამკვირვებელი აკვირდებოდა. საარჩევნო ადმინისტრაციაში აკრედიტებულია 15 მედიაორგანიზაციის 221 წარმომადგენელი. არჩევნებში მონაწილე საარჩევნო სუბიექტების მიერ რეგისტრირებულია დაკვირვების უფლების მქონე 37 წარმომადგენელი.