მეუფე იაკობი უხამსი სიტყვებისთვის შენდობას ითხოვს, თუმცა მაღალჩინოსნებზე ნათქვამს ადასტურებს

ძალიან ბევრი დაბრკოლდა ჩემი საუბრის და ლექსიკის გამო, ყველას შენდობას ვთხოვ, ყველას ბოდიშს მოვუხდი, – ამის შესახებ მეფე იაკობმა განაცხადა. ამასთან ერთად, მეუფე იაკობმა კიდევ ერთხელ ისაუბრა შეხვედრაზე, რომელიც, მისი თქმით, გიორგი კვირიკაშვილის კაბინეტში გაიმართა.

„ყველამ უნდა გაითვალისწინოს ჩემი მდგომარეობა - სამი წელი ისეთი რამეები ვიცოდი, როგორც ეპისკოპოსმა, რაღაც პოლიტიკოსებისგან ჩარევა, როგორც მონაზონს, გულში ისე მქონდა. ახლა ვარ თავისუფალი ადამიანი. ვთქვი, რაც ვთქვი, ჩემი სიტყვები უკან არ მიმაქვს, იმაზე კი, კიდევ ერთხელ გეუბნებით, ბოდიშს მოვიხდი.

სამი ადამიანი შემხვდა მე, მეოთხე არ შემხვედრია, ეს იყო პრემიერის კაბინეტში. თვითონ გიორგი კვირიკაშვილი ბრძანდებოდა, ვახტანგ გომელაური და შინაგან საქმეთა მინისტრი გიორგი გახარია. ისინი უხერხულობას გრძნობდნენ იმის გამო, თუ რა თემაზეც საუბრობდნენ. ეს გიორგისაც შევამჩნიე და ბატონ ვახტანგსაც. რაღაც მკითხეს, 10 დღე არ ვეუბნებოდი უწმინდესს იმ რაღაცას და შემდეგ მაინც ვუთხარი და ღირსეული პასუხიც შევუთვალეთ.​ პრემიერთან საუბარი არა ლიკვიდაციაზე, არამედ იმაზე იყო, თუ ვინ იქნებოდა პატრიარქის შემცვლელი. თავისთავად, შიოს კანდიდატურა იქნებოდა, რადგან თანამოსაყდრე იყო - ეს არ ნიშნავს, რომ ამ მთავრობის კაცია“, - განაცხადა მეუფე იაკობმა.

მეუფე იაკობმა ტელეკომპანია „პირველის“ ეთერში თქვა, რომ „ყოფილი პრემიერმინისტრი გიორგი კვირიკაშვილი, სუს-ის ყოფილი უფროსი, ვახტანგ გომელაური და ეკონომიკის ყოფილი მინისტრი, გიორგი გახარია მას პატრიარქის გადაყენებაში დახმარებას სთხოვდნენ. მისი თქმით, შეხვედრაში ასევე მეუფე თეოდორე, მეუფე გრიგოლი და მეუფე პეტრე მონაწილეობდნენ.

მეუფე იაკობის თქმით, შეხვედრა ყოფილი პრემიერის კაბინეტში შედგა. განცხადებას გიორგი გახარია გამოეხმაურა. ინტერვიუ პოლიტიკოსებმა, სასულიერო პირებმა და თეოლოგებმა შეაფასეს.