წულუკიანი: დეკანოზ მამალაძეს ჯანმრთელობასთან დაკავშირებით პრობლემები არ აქვს

საქართველოს იუსტიციის მინისტრის განცხადებით, დეკანოზ გიორგი მამალაძეს ჯანმრთელობასთან დაკავშირებით პრობლემები არ აქვს, თუმცა ალტერნატიული ექსპერტიზის დასრულებამდე ის სამკურნალო დაწესებულებაში რჩება.  

თეა წულუკიანმა „დღის ქრონიკის“ ეთერში განაცხადა, რომ პრეზიდენტთან მამალაძის შეწყალების შუამდგომლობის მიზეზად მისი ჯანმრთელობის მდგომარეობა ვერ დასახელდება: 

„ის რაც მოვისმინეთ, რომ თითქოს დეკანოზ გიორგი მამალაძის ჯანმრთელობის მდგომარეობის გამო მოხდება პრეზიდენტისადმი შეწყალების შუამდგომლობით მიმართვა, ამ შემთხვევაში ჩვენ დაგვჭირდება ეს საკითხი განვიხილოთ ჩვენს დონეზე. არა იმიტომ რომ შეწყალების კომპეტენცია გვაქვს, ეს პრეზიდენტის უფლებაა და ვერავინ ჩაერევა. ვინაიდან ეს ადამიანი ჩვენს დაწესებულებაში იხდის სასჯელს ჩვენი პოზიცია მომავალში იქნება საზოგადოებისთვის მოხსენებული,“- განაცხადა თეა წულუკიანმა.  

მისი თქმით, დეკანოზს ჯანმრთელობის განსაკუთრებული მძიმე მდგომარეობა არ აქვს:

„ამას ადასტურებს სულ ბოლოს ჩატარებული ექსპერტიზის დასკვნა, რომელმაც ერთი რეკომენდაციაც კი არ გასცა მისი მკურნალობის შესახებ. ის ამ დასკვნას არ დაეთანხმა იმიტომ რომ დასკვნაში როგორც ჩანს მისთვის მიუღებელი შედეგები იყო. რასაც ვერ ვასაჯაროებ, რაკი პერსონალური ინფორმაციაა. მან დანიშნა ალტერნატიული ექსპერტიზა. ალტერნატიული ექსპერტიზის პასუხი ჯერ არ არის მაგრამ ის სამედიცინო დიაგნოზები რაც ჩვენ გვაქვს, სხვადასხვა ექიმების, ექსპერტების და კონსილუმების დეკანოზს არანაირი პრობლემა არ გააჩნია ჯანმრთელობასთან დაკავშირებით. მიუხედავად ამისა ის ალტერნატიული ექსპერტიზის დასრულებამდე რჩება სამკურნალო დაწესებულებაში. შემდეგ იქნება გადაწყვეტილება მიღებული მისი იქვე დატოვების თუ საპატიმროში დატოვების,“- განმარტა წულუკიანმა.  

მსჯავრდებული დეკანოზის ადვოკატი იმედოვნებს, რომ საპატრიარქო პრეზიდენტს გიორგი მამალაძის შეწყალების შუამდგომლობით შემჭიდროვებულ ვადებში მიმართავს.     

სინოდის სხდომიდან გამოსულმა პეტრე ცაავამ თქვა, რომ სინოდი დეკანოზ გიორგი მამალაძეს პრეზიდენტთან შეწყალებაზე უშუამდგომლებს.

ეს ინფორმაცია Imedinews-ს საპატრიარქოს პრესსამსახურის უფროსმა, მამა ანდრია ჯაღმაიძემ დაუდასტურა. მისი თქმით, ადმინისტრაციას შუამდგომლობით „მალე მიმართავენ“.  

გიორგი მამალაძე მკვლელობის მომზადების ბრალდებით თბილისის აეროპორტში 2017 წლის 10 თებერვალს დააკავეს. ის ბერლინში მიფრინავდა, სადაც საქართველოს პატრიარქს ოპერაციისთვის ამზადებდნენ.