მეუფე ნიკოლოზი: პეტრე ცაავას დღეს ყველაფერი ისე ჰქონდა მომზადებული, რომ ჩვენ ის განგვეკვეთა

პეტრე ცაავას ყველაფერი ჰქონდა დღეს იმისათვის მომზადებული, რომ ჩვენ ის განგვეკვეთა. ტყუილია რომ მან დროზე ადრე დატოვა სინოდი, ცრუობს როცა ამბობს რომ ის პატრიარქმა გადააყენა, ის გადააყენა სინოდმა - ამის შესახებ ახალქალაქის, კუმურდოსა და კარის ეპარქიის მიტროპოლიტმა, ნიკოლოზ​​ ფაჩუაშვილმა თეა სიჭინავასთან „დღის ქრონიკაში“ ისაუბრა. 

მეუფე ნიკოლოზი უშუალოდ ესწრებოდა სინოდის სხდომას. მისი თქმით, სამწუხარო მოვლენა მოხდა და მეუფე პეტრე პატრიარქს არ გადაუყენებია, „ტყუილია რომ ის თანამდებობიდან პატრიარქმა გადააყენა. თანმიმდევრობით მოგიყვებით. მისი შეურაცხყოფები უკვე დიდი ხანია რაც გრძელდება და დღევანდელ სინოდის სხდომაზეც გაგრძელდა. ის კვლავ უხამსად მოიქცა და ჩვენ ყველამ ვთხოვეთ, ბოდიში მოეხადა შეურაცხყოფისთვის და მეტჯერ არ გაემეორებინა, თუმცა მან კვლავ გააგრძელა უხამსი მოწოდებები და ჩვენ დაჟინებულად პატრიარქს მისი გადაყენება მოვთხოვეთ. ბოლოს იქამდე მივიდა საქმე იძულებულები გავხდით ხელით გაგვეყვანა. არაადამიანურად ყვიროდა, პატრიარქისკენ გაიწია კიდეც და იძულებული გახდა რამდენიმე მღვდელმთავარი პატრიარქის უსაფრთხოებიდან გამომდინარე, გადაფარებოდა მას.  რაც უფრო ბევრს ვფიქრობ, უფრო ვრწმუნდები, მეუფე პეტრეს ყველაფერი ჰქონდა დღეს იმისათვის მომზადებული, რომ ჩვენ ის განგვეკვეთა “, - აღნიშნა მიტროპოლიტმა.

მეუფე ნიკოლოზის თქმით, პეტრე ცაავა სხდომაზე კიდევ უფრო უხამსად მოიქცა, ვიდრე თავისდროზე მეუფე იაკობი.

ასევე მეუფემ აღნიშნა, რომ პეტრე ცაავას გადაყენება წინასწარ არ იყო შეთანხმებული.  „დეტალებს ზუსტად ვერ მოვყვები. რა განცხადებაც გააკეთა, ეს იყო სამარცხვინო საქციელი, ასეთი დამსახურებელი პატრიარქისთვის ეს არის ცილისწამება. მისი გადაყენება წინასწარ არ იყო შეთანხმებული. ეს არ იყო გადაწყვეტილება, ეს იყო მოქმედება, რომ ის ჩვენი ძალით გავიყვანეთ სხდომიდან. მისი საქციელი წინასწარ მომზადებულს ჰგავდა. პატრიარქი არასდროს არ სჯის ადამიანს დანაშაულისთვის. ერთადერთი კომენტარი რაც მან  გააკეთა,  არის ის რომ  იგი დათანხმდა ჩვენს დაჟინებულ თხოვნას მეუფე პეტრეს განკვეთის შესახებ“, - განაცხადა მიტროპოლიტმა.

მეუფე ნიკოლოზმა პეტრე ცაავას ბრალდების მოწმეებზეც ისაუბრა და აღნიშნა, რომ ამ დროს ჯერ უნდა დაამტკიცო ბრალდება და შემდეგ გააჟღერო. „საერთოდ როცა ასეთი ბრალდებით გამოდიხარ ჯერ უნდა წარადგინო მტკიცებულებები და მერე გააჟღერო, ეს არის წესი, თუმცა აქ პირიქით მოხდა. თუ არ დამტკიცდა, ბრალდებულმა თვითონ უნდა აგოს პასუხი, თუმცა მამა პეტრეს ამის შესახებ არაფერი არ უთქვამს“. - განაცხადა მეუფე ნიკოლოზმა. 

დღეს საპატრიარქოში სინოდის სხდომა გაიმართა. სხდომიდან პირველი პეტრე ცაავა გამოვიდა, რომელმაც თქვა, რომ პატრიარქმა ის მღდელმთავრობიდან გადააყენა. მან ასევე განაცხადა, რომ „ერს ჰყავს პედარასტიის, მამათმავლობის ცოდვით შეპყრობილი სინოდის თავმჯდომარე“. მოგვიანებით მან ეს სიტყვები განმარტა. 

სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა. 

სინოდის სხდომა საერო ხელისუფლებამაც შეაფასა.