ლინკევიჩუსი: ხმები ნატოს გარდაცვალების შესახებ გადაჭარბებულია

„ხმები ნატოს გარდაცვალების შესახებ უკიდურესად გადაჭარბებულია“, - ასე პასუხობს ლიეტუვის საგარეო საქმეთა მინისტრი „ნატოს ტვინის სიკვდილზე“ საფრანგეთის პრეზიდენტის, მაკრონის განცხადებას.

ლინას ლინკევიჩუსმა „ქრონიკასთან“ თქვა, რომ „ოპონენტებს არგუმენტები არ უნდა მივცეთ, ნატო ძლიერია, რაც ისტორიამ ძალიან ბევრჯერ დაამტკიცა და ვითარება ასეთი დრამატული ნამდვილად არ არის“.

„ეს ცნობილი ფრაზა ძალიან კარგად ასახავს ჩემს დამოკიდებულებას და განწყობას. ჩვენ არ უნდა გავაზვიადოთ არსებული ვითარება. არ უნდა გადავაჭარბოთ იმ შეფასებებს, რომლებსაც ჩვენი ოპონენტები ხშირად აკეთებენ და მათ ხელში არგუმენტები მივცეთ.

ალიანსში პრობლემები დაარსების დღიდან არსებობს. ჩვენ ბევრი რამ გამოვიარეთ ერთად. გადავლახეთ კრიზისული სიტუაციები და ერთად ვიმუშავეთ იმისათვის, რომ ალიანსი ძლიერი ყოფილიყო და ეს ასეც არის. ყოველთვის შევძელით სირთულეების გადალახვა. დიახ, გვჭირდება მეტი კოორდინაცია, ტრანსატლანტიკური სიძლიერე. მე ამას ვუყურებ როგორც პროცესს. ნატო ძლიერია, ნატო მოქნილია და ნატოს შესწევს ძალა, გაუმკლავდეს გამოწვევებს. ეს ისტორიამ ძალიან ბევრჯერ დაამტკიცა. ვითარება ასეთი დრამატული ნამდვილად არ არის“, - განუცხადა „ქრონიკას“ ლიეტუველმა დიპლომატმა.

ალიანსის „განახლების“ საკითხზე დისკუსიებში სხვა ლიდერებიც ჩაერთვნენ. აშშ-ის სახელმწიფო მდივნის, მაიკ პომპეოს თქმით, „70 წელი გავიდა, ალიანსს ზრდა და ცვლილებები სჭირდება და დღევანდელი დღის რეალობას და გამოწვევებს უნდა დაუპირისპირდეს. 

გერმანიის კანცლერი ანგელა მერკელი კი, ფრანგი ლიდერის შეფასებას არ იზიარებს. მერკელის თქმით, ალიანსთან დაკავშირებით პრობლემები იყო, თუმცა ნატო სიძლიერისა და უსაფრთხოების მხრივ, სასიცოცხლო მნიშვნელობის ორგანიზაციად რჩება.

კრიტიკის მთავარმა ადესატმა, ნატოს გენდმივანმა კი თქვა, რომ „ალიანსი ისევ ძლიერია“.

ემანუელ მაკრონმა გავლენიან ბრიტანულ გამოცემა Economist-თან საუბრისას, ევროპელი მეზობლები გააფრთხილა, რომ მათ აღარ უნდა ჰქონდეთ მოლოდინი, თითქოს, აშშ ნატოს მოკავშირეებს დაიცავს.

„რასაც ჩვენ ახლა ვხედავთ, არის ნატოს ტვინის სიკვდილი“, - თქვა მაკრონმა.