დიმიტრი ხუნდაძე: პოლიტიკური სპექტრი პროპორციულზე გადასასვლელად მზად არ არის

საპარლამენტო უმრავლესობის წევრები „ქართული ოცნების” ოფისში პროპორციულ საარჩევნო სისტემაზე გადასვლასთან დაკავშირებით შეხვედრას მართავენ. 12 ნოემბერს პარლამენტში სხდომის დროს ცნობილი გახდა, რომ უმრავლესობის რამდენიმე წევრი პროპორციული წესით არჩევნების ჩატარებას არ ეთანხმება. სწორედ ამ საკითხზე მსჯელობენ დღეს მმართველი პარტიის ოფისში.

ერთ-ერთი, ვინც ამბობს, რომ პროპორციულ სისტემასთან დაკავშირებით კითხვები აქვს, დიმიტრი ხუნდაძეა. მისი განცხადებით, „დღეს პოლიტიკური სპექტრი პროპორციულზე გადასასვლელად მზად არ არის”. ამის შესახებ ხუნდაძემ ოფისში შესვლამდე თქვა.

„ეს არ არის გუშინდელი გადაწყვეტილება, მე ამ სისტემას ყოველთვის ეჭვქვეშ ვაყენებდი და ორჯერ კომპრომისი გავწიე იმის გამო, რომ ეს იყო პირობა დადებული, როცა არც ერთი და არც მეორე პირობა არ შესრულდა”, - თქვა დიმიტრი ხუნდაძემ და დასძინა, რომ დღეს მას გაცილებით მეტი თანამოაზრე ჰყავს ამ საკითხზე, ვიდრე გუშინ საღამოს ჰყავდა. 

„არ მინდა, საკითხი დადგეს ისე, რომ გუნდში ხმების რაოდენობით ჭიდაობა დავიწყოთ. მინდა, რომ საკუთარი გუნდი დავარწმუნო და ის საფრთხეები ვაჩვენო, რაზეც ჩვენ ვსაუბრობთ და რაც მთავარია, დავარწმუნოთ პარტიის თავმჯდომარე, რომ ეს გადაწყვეტილება ხიფათის შემცველია“, - განაცხადა ხუნდაძემ.

უმრავლესობის წევრი, რომან კაკულია კი ფიქრობს, რომ რა დაპირებაც იყო, ის უნდა გაგრძელდეს, დეპუტატი არ გამორიცხავს, რომ „ბევრი ადამიანი გააღიზიანა ბევრი პოლიტიკოსის საკმაოდ არაადეკვატურმა დამოკიდებულებამ“. 

კაკულიას თქმით, პროპორციული წესით არჩევნების ჩატარება ხელს უწყობს როგორც როგორც დემოკრატიის, ისე პოპულიზმის განვითარებას. 

„ადამიანებს ჰქონდათ შეგრძნება, რომ ისინი ამ პროცესის თანამონაწილეები იყვნენ. ამდენმა ძახილმა, რომ იძულებით და ძალით გაეკეთებინათ ყველაფერი, არ გამოვრიცხავ, რომ ადამიანებში, ვისაც სურდა ამ პროცესის თანამონაწილე ყოფილიყო, უარყოფითი რეაქცია გამოიწვია. პროპორციული სისტემა იყო დათმობა ოპოზიციის მიმართ, არა საზოგადოების მიმართ. არ გავაზვიადოთ, მიუხედავად იმისა, რომ 10 000 კაციც მნიშვნელოვანია”, - განაცხადა კაკულიამ.

დღესვე პროპორციულ სისტემაზე გადასვლის შესახებ მსჯელობა პარლამენტშიც გაგრძელდება. 12 ნოემბერს საკანონმდებლო ორგანომ ოპოზიციის მიერ მომზადებულ კანონპროექტს, რომელიც 2020 წლის საპარლამენტო არჩევნები სრულად პროპორციული წესით, 3%-იანი ბარიერით ჩატარებას გულისხმობდა, მხარი არ დაუჭირა. კანონპროექტს, რომელსაც 200 000-ზე მეტი მოქალაქის ხელმოწერა ჰქონდა, მხარი მხოლოდ 32-მა დეპუტატმა დაუჭირა მხარი, 55-მა კი წინააღმდეგ მისცა. 

უმრავლესობის მიერ მომზადებული კანონპროექტი 2020 წლის საპარლამენტო არჩევნების პროპორციული სისტემით ჩატარებას გულისხმობს ნულოვანი ბარიერის პირობებში. ამისთვის კი აუცილებელია საკონსტიტუციო ცვლილებები. ნულოვანი ბარიერით არჩევნების ჩატარება 2024 წლის საპარლამენტო არჩვნების დროს იგეგმებოდა, ტუმცა 20-21 ივნისის ღამეს განვითარებული მოვლენების შემდეგ, პარტია "ქართული ოცნება - დემოკრატიული საქართველოს" თავმჯდომარემ განაცხადა, რომ 2020 წლის საპარლამენტო არჩევნები პროპორციული სისტემით, ნულოვანი საარჩევნო ბარიერის პირობებში ჩატარდება.

რა უნდა ვიცოდეთ არჩევნების პროპორციული სისტემის და ნულოვანი ბარიერის შესახებ? შეგიძლიათ ამ ბმულზე წაიკითხოთ.