ოპოზიციას და დამოუკიდებელ დეპუტატებს „გამბედავი მაჟორიტარების“ არ სჯერათ

დამოუკიდებელი დეპუტატის ლევან გოგიჩაიშვილის განცხადებით, ავანსცენაზე "გამბედავი მაჟორიტარების" გამოჩენა არის მისტიკა და ზღაპარია. ამის შესახებ მან პარლამენტში ჟურნალისტებს უთხრა.

ლევან გოგიჩაიშვილის თქმით, ამ პროცესის ჩაგდება "ქვეყნის მტრების ინტერესებში შედის, გინდ შიდა იყოს, გინდა გარე". 

"პროგნოზისგან ვეცდები თავი შევიკავო, მაგრამ ვნერვიულობ ჩვენს მოქალაქეებთან ერთად. თუმცა, ფაქტია ეს არის შეთანხმებული, კონტროლირებადი და არავითარი დაპირისპირება და შეწინააღმდეგება არ არსებობს", - განაცხადა ლევან გოგიჩაიშვილმა.

საპარლამენტო უმრავლესობაში აზრთა სხვადასხვაობის დამოუკიდებელ დეპუტატ ეკა ბესელიასაც არ სჯერა. როგორც ის ამბობს, "ოპტიმისტური მოლოდინი არ აქვს".

"აქ ორი ვერსიაა. ნებისმიერ შემთხვევაში, თუ კანონპროექტი ჩავარდა, დაბრალდება ბიძინა ივანიშვილს და მისი პასუხისმგებლობა იქნება. ამიტომ მან ყველა რესურსი უნდა გამოიყენოს და აქვს ამის შესაძლებლობა, რომ თუ ვინმე გულწრფელად წინააღმდეგია, დაარწმუნოს, ხოლო ზოგიერთის ახლა გაბრაზებული და შეცვლილი პოზიციის მე არ მჯერა. მეორე შემთხვევაში, თუ იქნება შეცვლილი პოზიცია და მიიღებს გადაწყვეტილებას უმრავლესობა და მხარს დაუჭერს, ამასაც მმართველი პარტია მიიწერს რა თქმა უნდა. თუმცა, ალბათ, აქ უნდა დავინახოთ შემდეგი პროცესი - იმ დეპუტატების შემდეგი ნაბიჯი, რომელთა პოზიცია იქნება პრინციპულად განსხვავებული, ალბათ, იქნება უმრავლესობის დატოვება. ეს არ არის მარტივი პროცესი. ეს გადაწყვეტილება თუ არ იქნება შესრულებული, ქვეყანაც დაზიანდება და ძალიან სერიოზულ კრიზისში შეიძლება შევიდეს პროცესი", - განაცხადა ეკა ბესელიამ. 

ნაციონალური მოძრაობის წევრის, დეპუტატ რომან გოცირიძის განცხადებით კი მას არ სჯერა "მეფის წინააღმდეგ პაიკების ამხედრების".

"ვინმეს სჯერა, რომ შეიძლება პაიკები აუმხედრდნენ მეფეს? ამას შეიძლება უწოდო "უჩინართა ბუნტი". ადამიანები, რომლებსაც საკუთარი ჩრდილისაც კი ეშინიათ, დღეს გამოდიან და უპირისპირდებიან ივანიშვილს? წარმოგიდგენიათ, რომ ვინმე დეპუტატი დაჩი ბერაია და ივანიშვილი 7 საათი კამათობდნენ და არ დაეთანხმა დაჩი ბერაია ივანიშვილს, რომელმაც დაიპყრო მთელი ქვეყანა? თურმე წარუმატებლად დამთავრდა ფეხბურთელ ყაველაშვილთან მისი კონსულტაციები, სისულელეა ეს. ის ახლა აკვირდება საზოგადოების განწყობას და დიპლომატიური კორპუსის რეაგირებას. ბიძინა ივანიშვილს ამ წუთას აქვს ორი არჩევანი ორი სცენარიდან: წავიდეს ოპოზიციაში ან წავიდეს პოლიტიკურ მოუსავლეთში", - განაცხადა რომან გოცირიძემ.

"ევროპული საქართველოს" წევრმა, დეპუტატმა სერგი კაპანაძემ კი Facebook-ზე დაწერა თუ რამდენი მხარდამჭერი ჰყავს პროპორციულ სისტემაზე გადასვლას პარლამენტში. ისიც აცხადებს, რომ არ სჯერა იმის, თითქოს მმართველ პარტიას პარლამენტში უმრავლესობა აღარ აქვს.

"113 ხმაა საჭირო 150-დან. 43 ხმა უკვე არის (ჩვენ, ენმ, პატრიოტები, დამოუკიდებელი დეპუტატები)
ოცნებისგან საჭიროა 70 ხმა! 75 ხმა სჭირდება პარლამენტში უბრალო უმრავლესობას! ანუ, უბრალო უმრავლესობა აღარ აქვს ბიძინას პარლამენტში? ეგ ნაცარი თვალებში შეაყარეთ ბიძინათქვენებს...", - დაწერა სერგი კაპანაძემ სოციალურ ქსელში. 

პარტია "ქართული ოცნების" ოფისში საპარლამენტო უმრავლესობის შეხვედრა ცოტა ხნის წინ დასრულდა. როგორც შეხვედრის შემდეგ დიმიტრი ხუნდაძემ თქვა "გაიმარჯვა დემოკრატიამ, გაიმართება თავისუფალი კენჭისყრა". 

ახლა მსჯელობა პარლამენტში გაგრძელდება, სადაც პროპორციულ სისტემაზე კენჭისყრა გაიმართება.

ოპოზიციის აზრით, თუ ქვეყანა პროპორციულზე არ გადავა, აქციები გარდაუვალია. 12 ნოემბერს პარლამენტმა 2024 წლის საპარლამენტო არჩევნების პროპორციული სისტემით, 3%-იანი ბარიერის პირობებში ჩატარებაზე, ოპოზიციის კანონპროექტს მხარი არ დაუჭირა. 

უმრავლესობის მიერ მომზადებული კანონპროექტი 2020 წლის საპარლამენტო არჩევნების პროპორციული სისტემით ჩატარებას გულისხმობს ნულოვანი ბარიერის პირობებში. ამისთვის კი აუცილებელია საკონსტიტუციო ცვლილებები. ნულოვანი ბარიერით არჩევნების ჩატარება 2024 წლის საპარლამენტო არჩვნების დროს იგეგმებოდა, თუმცა 20-21 ივნისის ღამეს განვითარებული მოვლენების შემდეგ, პარტია "ქართული ოცნება - დემოკრატიული საქართველოს" თავმჯდომარემ განაცხადა, რომ 2020 წლის საპარლამენტო არჩევნები პროპორციული სისტემით, ნულოვანი საარჩევნო ბარიერის პირობებში ჩატარდება.

რა უნდა ვიცოდეთ არჩევნების პროპორციული სისტემისა და ნულოვანი ბარიერის შესახებ? შეგიძლიათ ამ ბმულზე წაიკითხოთ.