კალაძე: უცხოელი პარტნიორების შეფასებები დაბალანსებული იყო

უცხოელი პარტნიორების შეფასებები იყო დაბალანსებული, სხვანაირს არც ველოდი, - ამის შესახებ თბილისის მერმა, კახა კალაძემ ჟურნალისტებთან საუბრისას განაცხადა.

კალაძის თქმით, 2020 წელს პროპორციულ საარჩევნო სისტემაზე გადასვლის შესახებ საკონსტიტუციო ცვლილებების ჩავარდნასთან დაკავშირებით უცხოელი პარტნიორების შეფასებები მწვავე არ ყოფილა.

„მწვავე შეფასებებს ვერ ვიტყვი, ჩვენ მწვავე შეფასებები გვახსოვს და გვინახავს ბევრი. ეს იყო მათი მხრიდან გაკეთებული დაბალანსებული შეფასებები. მე პირადად, სხვანაირს არც ველოდი. რჩევები, რაც იქნა დღესაც გაცხადებული ევროკავშირის ელჩის მიერ, რომ არსებულ საარჩევნო სისტემაში განსახორციელებელია გარკვეული ცვლილებები, ამაზე პარლამენტი მუშაობს და ეს ცვლილებები განხორციელდება. ვფიქრობ, ცვლილებების განხორციელება ზოგადად პოლიტიკური სპექტრისთვის არის მნიშვნელოვანი“, - განაცხადა თბილისის მერმა.

მისი შეფასებით, ქვეყანას ზიანი არადემოკრატიული საარჩევნო სისტემის შემთხვევაში მიადგებოდა.

„ზიანი ქვეყანას იმ შემთხვევაში მიადგებოდა, თუ საარჩევნო სისტემა იქნებოდა არადემოკრატიული. არსებული საარჩევნო სისტემით ზუსტად ჩვენ ვართ ის ხელისუფლება, ვინც შეცვალა სააკაშვილის რეჟიმი. იგივე სისტემა იყო, არანაირი განსხვავება არ ყოფილა. ვიღაცისთვის შეიძლება, ერთი უკეთესი ყოფილიყო, ვიღაცისთვის მეორე. მე ვემხრობოდი პროპორციულ საარჩევნო სისტემას“, - განაცხადა კახა კალაძემ.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. ოპოზიციური პარტიები მხარდამჭერებს პარლამენტთან აქციაზე მისვლისკენ მოუწოდებენ. 

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.