სოზარ სუბარი: პოლიცია და სპეცრაზმი მოქმედებდა კანონის ფარგლებში

„როდესაც პოლიცია და სპეცრაზმი მოქმედებდა კანონის ფარგლებში, ვიხილეთ აღმაშფოთებელი თავდასხმები პოლიციელებზე“, - ამის შესახებ საქართველოს პრემიერმინისტრის მრჩეველმასოზარ სუბარმა ტეკომპანია „მთავარის“ეთერში განაცხადა. 

სუბარის განცხადებით „ნაციონალური მოძრაობის“ ლიდერი, პარტიის თავმჯდომარე, პრეზიდენტობის კანდიდატი, კულტურისა და საგარეო საქმეთა ყოფილი მინისტრი გრიგოლ ვაშაძე ვაშაძე სპეცრაზმელს თავს დაესხა:  

„როდესაც ეს განცხადებები გადადის ქმედებებში, როდესაც ხდება პარლამენტის ბლოკირება, პარლამენტის წევრებზე ფიზიკური თავდასხმები, რაც დღეს დილით ვიხილეთ, ბოქლომების დადება პარლამენტის შენობაზე თუ სხვა ადმინისტრაციულ შენობებზე, ბლოკირება სახელმწიფო შენობების, მაშინ, ბუნებრივია, უფლება კი არ აქვს, მოვალეა იმოქმედოს და ეს მოქმედება განხორციელდა. აღკვეთილია ეს უკანონობა, რომელიც განხორციელდა და ყველა აღიარებდა, რომ ეს იყო უკანონო ქმედება. ისინიც კი, ვინც ცდილობდნენ, გაემართლებინათ მომიტინგეები, ვერ მალავდნენ, რომ ეს იყო უკანონო ქმედება, თვით მომიტინგეებისა და მათი ლიდერების ჩათვლით. იმ დროს, როდესაც პოლიცია, სპეცრაზმი მოქმედებდა კანონის ფარგლებში, ვიხილეთ აღმაშფოთებელი თავდასხმები პოლიციელებზე და განსაკუთრებით გამოვყოფ „ნაციონალური მოძრაობის“ ლიდერის, მათი თავმჯდომარის, მათი პრეზიდენტობის კანდიდატის, კულტურისა და საგარეო საქმეთა ყოფილი მინისტრის ვაშაძის გაუგონარ ქმედებას, როდესაც თავს დაესხა სპეცრაზმელებს და ხელებს ურტყამდა, უტყაპუნებდა მათ, ეს ცდება ყველანაირ ადამიანურ ჩარჩოებს, რაც შეიძლება ადამიანმა წარმოიდგინოს. ამის გამო, „ნაციონალური მოძრაობა“ გადაიხდის კიდევ ერთხელ, ძალიან მწარე პოლიტიკურ ფასს, ხოლო რაც შეეხება სამართლებრივ შეფასებას, ამაზე ალბათ შემდგომში იქნება საუბარი“, – განაცხადა სოზარ სუბარმა.

„ნაციონალური მოძრაობის“ ლიდერმა, გრიგოლ ვაშაძემ დღეს აქციის დაშლის შემდეგ სპეცრაზმელს ფიზიკური შეურაცხყოფა მიაყენა. ინფორმაცია 1tv.ge გაავრცელა. 

სპეცრაზმმა რუსთაველზე საავტომობილო გზა აქციის მონაწილეებისა და კარვებისგან გაწმინდა. მანამდე სპეცრაზმმა რამდენჯერმე გამოიყენა წყლის ჭავლი. 

აქციის მონაწილეები შინაგან საქმეთა სამინისტრომ და თბილისის მერიის შესაბამისმა უწყებებმა აქციის დაშლამდე რამდენჯერმე გააფრთხილეს.

დღეს დილით პარლამენტში დეპუტატები არ შეუშვეს. რუსთაველის გამზირი მეორე დღეა აქციის გამო გადაკეტილია.

17 ნოემბერს, ღამე აქციის მონაწილეებმა და ოპოზიციის წარმომადგენლებმა პარლამენტის შესასვლელები ტომრებით ჩაკეტეს, მანამდე კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. პარალელურად აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.