წულუკიანი: პროპორციულ სისტემაზე გადასვლის შესახებ ივანიშვილის იდეას თათბირზე დაპირისპირება მოჰყვა

იუსტიციის მინისტრის, ვიცეპრემიერის თეა წულუკიანის განცხადებით, პროპორციულ საარჩევნო სისტემაზე გადასვლის შესახებ წინადადება ბიძინა ივანიშვილის მიერ შეთავაზებული იდეა იყო და არა დაპირება, ეს კი პარტიაში ვიღაცებმა არ გაიზიარეს.

გადაცემა „დღის ქრონიკის“ ეთერში წულუკიანმა თქვა, რომ დეპუტატი რომ ყოფილიყო, ამ იდეას მხარს არ დაუჭერდა, რადგან მაჟორიტარები ქვეყანას სჭირდება და ეს შესანარჩუნებელია. 

„ეს იდეა წამოვიდა ბიძინა ივანიშვილისგან და მე მიკვირს ადამიანების, რომლებიც ივანიშვილზე არიან ნაწყენი, რომ ეს იდეა ვერ გავიდა იმიტომ, რომ გარკვეულმა ჯგუფმა ხმა არ მისცა და მიდის სპეკულაციები იმაზე, რომ ამის უკან ალბათ ბიძინა ივანიშვილი დგას, თორემ ამას ოქრიაშვილი როგორ გაბედავდა.

მე ვარ მომსწრე, როდესაც ბატონმა ბიძინამ ეს იდეა თათბირზე გააჟღერა, დეპუტატები, რომლებმაც ხმა არ მისცეს, იგივე ხუნდაძე, ოქრიაშვილი ღიად დაუპირისპირდნენ და თქვეს, რომ ეს ჩვენ არ მოგვწონს. იქ იყო ცხარე კამათი. 

ასე რომ, ვისზე არიან განაწყენებულები არ მესმის. ეს იყო ბატონი ბიძინას მიერ შეთავაზებული იდეა და არა დაპირება. პარტიაში ვიღაცებმა ეს არ გაიზიარეს. დეპუტატად რომ დავრჩენილიყავი, მათ ჯგუფში ვიქნებოდი, რომელიც იტყოდა, რომ მაჟორიტარობა შესანარჩუნებელია და ქვეყანას ეს სჭირდება მათ შორის პოლიტიკოსად ჩამოყალიბებისათვის“, - განაცხადა თეა წულუკიანმა.