ზურაბ აბაშიძე: კარასინთან შეხვედრაზე პირველ რიგში ვაჟა გაფრინდაშვილის საკითხს დავაყენებ

რუსეთთან ურთიერთობების საკითებში პრემიერმინისტრის სპეციალური წარმომადგენელი ზურაბ აბაშიძე რუს კოლეგასთან შეხვედრაზე პირველი რიგში ვაჟა გაფრინდაშვილის საკითხს წამოჭრის.

ზურაბ აბაშიძემ „ქრონიკას“ განუცხადა, რომ ექიმი უსწრაფესად უნდა გათავისუფლდეს.

„ვაჟა გაფრინდაშვილი უნდა დაუბრუნდეს თავის ოჯახს. ეს არის ჩვენი მოთხოვნა. აქ ბევრი დისკუსია და დიალოგი საჭირო არ არის. ჩვენ ვიყენებთ ყველა საშუალებას. ჩართულია ყველა საერთაშორისო ორგანიზაცია. ვართ პარტნიორებთან მუდმივ კონტაქტზე. პრაღაშიც ამ შეხვედრას გამოვიყენებთ. ასეთი ფორმატი, ისეთი ფორმატი ამის დრო არაა. ახლა მთავარია, რომ ვაჟა გაფრინდაშვილი გაათავისუფლონ. ასეთია ჩვენი პრინციპული მიდგომა. ვნახოთ, რა პასუხს მივიღებთ და არის თუ არა ახალი ინფორმაცია.

ეს არის ნაწილი იმ დიდი პრობლემისა. ეს არის სიტუაცია ოკუპირებულ ტერიტორიებზე, საოკუპაციო ხაზთან, გამწვავებული ვითარება. ამ ყველაფერზე ვისაუბრებ. ასეთი საკითხების განსახილველად შექმნილია ჟენევის ფორმატი და 10-11 დეკემბერს დეტალური, საგნობრივი, სიღრმისეული საუბარი გვექნება ჩვენი ამერიკელი და ევროპელი კოლეგების ჩართულობით. ყველა შესაძლებლობა უნდა გამოვიყენოთ“, - განაცხადა ზურაბ აბაშიძემ.

რუსეთთან ურთიერთობების საკითხებში პრემიერმინისტრის სპეციალური წარმომადგენელი რუს კოლეგას გრიგორი კარასინს ხვდება. პრაღაში, შეხვედრის დაწყებამდე, რუსს დიპლომატს „ქრონიკა“ ესაუბრა. 

კარასინი „ქრონიკასთან“ საუბრისას ამბობს, რომ ოკუპანტების მიერ გატაცებული ექიმის, ვაჟა გაფრინდაშვილის ოჯახს ჯერ ვერაფერს ეტყვის.

„იმედი მაქვს, რომ გაათავისუფლებენ“, - თქვა კარასინმა. კითხვაზე როდის, კარასინი პასუხობს: „არ ვიცი, ეს კითხვა ჩვენ არ გვეხება“.

15 ნოემბერს ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის უკანონო გადაკვეთას ედავებიან.