კარასინი: დიდი იმედი მაქვს რომ ვაჟა გაფრინდაშვილის საკითხი მალე გადაწყდება

პრაღაში ზურაბ აბაშიძისა და გრიგორი კარასინის შეხვედრა დასრულდა. რუსმა დიპლომატმა აუდიენციის შემდეგ თქვა, რომ ზურაბ აბაშიძემ ვაჟა გაფრინდაშვილთან დაკავშირებით დასვა საკითხი.

„ჩვენ ვიცით ეს ამბავი. სხვადახვა დონეზე გვაქვს კონტაქტი ქართულ და ოსურ მხარესთან. მნიშვნელოვანია ინციდენტების პრევენციის და მათზე რეაგირების მექანიზმების სრულფასოვანი ამოქმედება. მე განვაცხადე ბატონ ზურასთან ის, რასაც გეუბნებით თქვენ. ჩვენ გვაქვს კონტაქტი, მაგრამ ეს არ არის საკმარისი. დიდი იმედი მაქვს, რომ ვაჟა გაფრინდაშვილთან დაკავშირებული საკითხი ახლო მომავალში გადაწყდება“, - აღნიშნა კარასინმა. 

ჟენევის დისკუსიებამდე ვაჟა გაფრინდაშვილი იქნება თუ არა სახლში, კარასინი ამბობს, რომ ეს, ცოტა არ იყოს, მიამიტური კითხვაა.

„მაქვს იმედი, რომ უახლოეს დღეებში გადაწყდება ეს საკითხი და დაბრუნდება. ვიმეორებ, იმედი მაქვს, მაგრამ ეს უნდა ჰკითხოთ მათ, ვინც იღებს გადაწყვეტილებებს სამხრეთ ოსეთში. ვაჟა გაფრინდაშვილი ამჟამად იმყოფება სამხრეთ ოსეთის რესპუბლიკის ტერიტორიაზე. ყველა კონტაქტი ამუშავებულია, რომ ის სახლში, თბილისში ოჯახთან დაბრუნდეს. მოდით დაველოდოთ“, - განაცხადა კარასინმა.

რუსი დიპლომატი ავიამიმოსვლის აღდგენის თემასაც შეეხო.

„განვიხილეთ ავიამიმოსვლის საკითხიც. ამ მიმართულებით ვაგრძელებთ სვლას. ეს უეცრად და ვერც ახალ წლამდე მოხდება. ამის მოლოდინი არ არის. ვიფიქრეთ როდის და რა ფორმით განახლდეს საქართველოსა და რუსეთს შორის ავიამიმოსვლა. ამის შესახებ შეთანხმებას მივაღწიეთ. ვიფიქრებთ და ვაგრძელებთ საქართველოში განვითარებულ მოვლენებზე დაკვირვებას. ყველაფერი ურთიერთკავშირშია, რაც თბილისის ქუჩებში ხდება და რა განწყობაც არის ქართულ საზოგადოებაში“, - განაცხადა გრიგორი კარასინმა. 

კომენტარი ზურაბ აბაშიძემაც გააკეთა. 

„ვესაუბრე მაქსიმალურად აქცენტირებულად. განვაცხადე, რომ ეს ქმნის ძალიან რთულ ჰუმანიტარულ ვითარებას და ეს ეხება არამარტო საოკუპაციო ხაზს, არამედ ქვეყანას მთლიანად. შეხვედრაზე აღვნიშნე, რომ ეს საფრთხეს უქმნის რეგიონს. ასეთი ინციდენტები ქმნიან ძალიან ცუდ პრეცედენტებს. ვისაუბრეთ დეტალებზე, როგორ განიცდიან ახლობლები, ქართული საზოგადოება და საერთაშორისო საზოგადოება. მან აღნიშნა, რომ მისი ხედვითაც დრამატული მოვლენაა. პირადი ემოციები და დამოკიდებულება დააფიქსირა. გამოთქვა მოლოდინი, რომ უმოკლეს ვადაში მოგვარდება საკითხი და უმოკლეს ვადაში მოხდება მისი გათავისუფლება. მათი მიდგომა ასეთია, რომ დამოუკიდებელი სახელმწიფოა და ამიტომ მათ აქვთ უფლება მიიღონ დამოუკიდებელი გადაწყვეტილებები. ჩვენი დამოკიდებულება იცით. ეს არის ჩვენი კარდინალური სხვაობა პოზიციებში. ღრმად შეყოლას და დიალოგს ამ თემაზე არ ვაპირებდით. ჩვენ ვთქვით, რომ ვაჟა გაფრინდაშვილი უნდა გაათავისუფლონ და დისკუსიების დრო არ არის“, - თქვა ზურაბ აბაშიძემ. 

15 ნოემბერს ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის უკანონო გადაკვეთას ედავებიან.