ვაშაძე: პრეზიდენტს საჯარო განცხადებების კეთება უნდა აეკრძალოს

უნდა მივიღოთ კანონი, რომლითაც პრეზიდენტს საჯარო გამოსვლები ექნება შეზღუდული და მხოლოდ წელიწადში ერთხელ, ახალ წელს ან საშობაოდ გამოვიდეს სიტყვით, მოგვილოცოს მხოლოდ დღესასწაულები და სხვა საკითხებზე არ ილაპარაკოს, - ამის შესახებ ჟურნალისტებს „ახალი საქართველოს“ ლიდერმა გიორგი ვაშაძემ განუცხადა, როცა მათ პრეზიდენტის ინაუგურაციიდან გასული წლის შეფასება სთხოვეს. 

„სალომე ზურაბიშვილმა თვითონ მოითხოვა, რომ ამნისტიის უფლება ჩამოერთვას. მას მხოლოდ ორი უფლება ჰქონდა: ამნისტიის უფლება და ლაპარაკის უფლება. ამნისტიაზე უარი თქვა თვითონ და რჩება მხოლოდ საჯარო გამოსვლები. ერთადერთი, რაც აზრად მომდის, არის ის, რომ მას საჯარო გამოსვლებიც უნდა შევუზღუდოთ. მივიღოთ კანონი, რომლითაც პრეზიდენტს საჯარო გამოსვლები ექნება შეზღუდული და მხოლოდ წელიწადში ერთხელ, ახალ წელს ან საშობაოდ გამოვიდეს სიტყვით, მოგვილოცოს მხოლოდ დღესასწაულები და სხვა საკითხებზე არ ილაპარაკოს. უნდა ავუკრძალოთ საუბარი ჯარზე ეკონომიკაზე, მეზობელ ქვეყნებზე, შეწყალებაზე, ყველა მიმდინარე პოლიტიკურ მოვლენაზე. მოგვილოცოს ახალი წელი, შობა, აღდგომა - იმედია აქ მაინც არ დაუშვებს რაიმე შეცდომას. ყველა მისი გამოსვლა არის შეურაცხმყოფელი, ანტისახელმწიფოებრივი და რუსეთის ინტერესების გაძლიერებას ემსახურება“, - განაცხადა ვაშაძემ.

10 დეკემბერს სალომე ზურაბიშვილმა ასეთი განცხადება გააკეთა: „ჩვენ არც ჯარი გვაქვს, არც იარაღი და არც გვექნება, არც ის დიდი ეკონომიკური პოტენციალი გვაქვს, რომ რეგიონი დავიპყროთ, მაგრამ ჩვენ გვაქვს ის ძლიერი იარაღი, რასაც ჰქვია ცოდნა, მეცნიერება, კულტურა“.

ამ განცხადებას პოლიტიკური შეფასებები მოჰყვა, მათ შორის თავდაცვის მინისტრის მხრიდან. 

მოგვიანებით საქართველოს პრეზიდენტის ადმინისტრაცია განცხადება გაავრცელა, რომელშიც აღნიშნულია, რომ სალომე ზურაბიშვილის სიტყვები ქართული ჯარის შესახებ დამახინჯდა და კონტექსტის გარეშე, ინტერპრეტაციით გავრცელდა. თავად სალომე ზურაბიშვილმა კი Facebook-ზე დაწერა, რომ მას საგანგებოდ აბულინგებენ.