როგორ დავეხმაროთ ადამიანს სუიციდის პრევენციაში

„სტრესის დროს შესაძლოა წამების განმავლობაში ჩამოყალიბდეს სუიციდის გადაწყვეტილება. ასეთ დროს ადამიანი არ უნდა დავტოვოთ მარტო, უნდა ვუთანაგრძნოთ და მივიყვანოთ სპეციალისტთან,“ - ეს განცხადება სტრესის მართვისა და ჯანმრთელობის ცენტრის ხელმძღვანელმა გუგა სიხარულიძემ, დღეს ტელეკომპანია „იმედში“ გადაცემა „დღის ქრონიკის“ ეთერში გააკეთა.

გუგა სიხარულიძემ მიმართა საზოგადოებას, რომ სტრესის დროს ადამიანები მარტო არ დატოვონ: 

„როგორც სპეციალისტმა მინდა მივმართო ადამიანებს, რომელთა გარშემო შეიძლება აღმოჩნდეს მეგობარი, მეზობელი, ნაცნობი, რომელმაც გადაიტანა სტრესი, დეპრესია, რაც შეიცავს სუიციდის რისკს არ მიატოვონ. ყველაზე მთავარი სუიციდის პრევენციაში არის ადამინების მოპყრობა. ეს არის ის ინფორმაცია, რომელიც ჩვენ უნდა მივიტანოთ მოქალაქეებამდე. ეს თემები უნდა გააქტიურდეს ტელევიზიით და ასეთი სასწავლო გეგმები უნდა არსებობდეს სკოლებში უნივერსიტეტებში,ეს უნდა ჰქონდეთ პოლიციელებს, მანდატურებს,“- განაცხადა გუგა სიხარულიძემ. 

სპეციალისტის განცხადებით, როცა ადამიანი ზედმეტად ჩაკეტილია, მოწყენილი და სოციალურ ქსელში აქვს სტატუსები რომლებიც მიანიშნებს, რომ ადამიანს სიცოცხლე აღარ უნდა და სუიციდს აპირებს, უნდა იყოს სპეციალური პროგრამა როგორ უნდა მივიდეთ ადამიანთან, როგორ მივუდგეთ და რა სიტყვები ვუთხრათ: 

„ეს არის თანაგრძნობა, ეს არის ახსნა იმის რომ ყოველთვის არსებობს გამოსავალი და ყოველთვის არსებობენ ადამიანები და სპეციალისტები, რომლებიც შეძლებენ მის დახმარებას. ასეთი ადამიანი არ უნდა დავტოვოთ მარტო. უნდა შევეცადოთ, რომ მწვავე აფექტური მდგომარეობიდან გადავატანინოთ ყურადღება და მეორე ეტაპზე სპეციალისტთან მივიყვანოთ,“ - განაცხადა გუგა სიხარულიძემ.   

ის „იმედის“ ეთერში 15 წლის მოზარდის ლუკა სირაძის თვითმკვლელობის ფაქტსაც გამოეხმაურა: 

„რაც შეეხება სუიციდის თემას, ყველა საკითხს სჭირდება განხილვა, მაგრამ რა ფორმატში ეს არის მთავარი. ზოგადად საჯარო განხილვები არც თუ ისე მიზანშეწონილია. ხშირ შემთხვევაში საჯარო განხილვა ამ თემის შესაძლოა გახდეს მაპროვოცირებელი სხვა ადამიანებში სუიციდის. თუმცა თუ ამ საკითხებში ჩაერთვებიან სპეციალისტები ეს შეხვედრები გასამართია. ეს ტრაგედია უნდა გახდეს ბიძგი, რომ შესაბამისმა სტრუქტურებმა უფრო მეტი იმუშაონ, იმისთვის რომ კარგი პროექტი დაიდოს სუიციდის პრევენციის.“

სპეციალისტის განცხადებით, ბევრ ქვეყანაში კარგად მუშაობს „სუიციდის ცხელი ხაზი“: 

„სტრესის დროს შესაძლოა წამებში ჩამოყალიბდეს სუიციდის გადაწყვეტილება. ასეთი მომსახურების არსებობისას იმ ზარის შემდგომ სპეციალისტმა უნდა იმოქმედოს და გადაარჩინოს ადამიანი,“- აცხადებს სპეცილისტი.