ჯანდაცვის მინისტრი: რესპუბლიკური საავადმყოფოს პერსონალი გარკვეული გარდაქმნისთვის მზადაა

„მე ავიღე თქვენზე პასუხისმგებლობა, რასაც შევასრულებ“, - ასე მიმართა ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ რესპუბლიკური საავადმყოფოს სამედიცინო პერსონალს. მინისტრი ცენტრალურ საუნივერსიტეტო კლინიკას ეწვია და სამედიცინო დაწესებულების წარმომადგენლებს საავადმყოფოსთან დაკავშირებული გეგმები გააცნო და მათგან უფრო დეტალური ინფორმაცია მიიღო. ინფორმაციას სამინისტრო ავრცელებს. 

„მე ვთლი, რომ ეს იყო ძალიან  პროდუქტიული შეხვედრა, მკვეთრად გამოიხატა სამედიცინო პერსონალის განწყობა. ისინი მზად არიან გარკვეული გარდაქმნებისთვის, რომელიც რა თქმა უნდა, არ იქნება მარტივი“, - განაცხადა ეკატერინე ტიკარაძემ.

სამედიცინო ჰოლდინგის ფარგლებში კიდევ ერთი სამუშაო შეხვედრა მომდევნო კვირაში ჩაინიშნა. მინისტრის თქმით, იანვრის დასაწყისში უკვე შემუშავდება განვითარების გარკვეული სტრატეგია.

მინისტრთან ერთად რესპუბლიკურ საავადმყოფოს საგანგებო სიტუაციების კოორდინაციისა და გადაუდებელი დახმარების ცენტრის დირექტორი ავთანდილ თალაკვაძე, სამედიცინო და ფარმაცევტული საქმიანობის რეგულირების სააგენტოს ხელმძღვანელი ზაალ კაპანაძე და სოციალური მომსახურების სააგენტოს დირექტორის მოადგილის მოვალეობის შემსრულებელი თამარ  მელიქიძეც ეწვია, რომლებმაც კლინიკა დაათვალიერეს და ხელმძღვანელ პირებთან სამუშაო შეხვედრა განაგრძეს.

პრემიერმინისტრი 4 დეკემბერს კლინიკების წარმომადგენლებს შეხვდა, რომლებმაც ღია წერილით მიმართეს და 520-ე დადგენილების შეჩერება სთხოვეს. დადგენილება ჯანდაცვის ახალი რეფორმის ფარგლებში საყოველთაო ჯანდაცვის პროგრამაში ჩართული კლინიკებისთვის ფასების გათანაბრებას გულისხმობს. შეხვედრას რეფორმის ავტორი, ჯანდაცვის მინისტრი ეკატერინე ტიკარაძეც დაესწრო.

კლინიკებმა პრემიერს და სხვადასხვა უწყების ხელმძღვანელს რეფორმის შეჩერების თხოვნით 15 ნოემბერს მიმართეს. სამედიცინო დაწესებულებებისთვის ერთიანი სატარიფო სისტემა 21 ნოემბრიდან ამოქმედდა.

სამედიცინო დაწესებულებებში მომსახურების ფასები გათანაბრდა. ეს კარგია თუ ცუდი? წაიკითხეთ ამ ბმულზე.