2020 წლის 1-ლი აპრილიდან თბილისში არასრულწლოვანთა სამმართველო შეიქმნება

მთავრობის ადმინისტრაციაში მოზარდების უსაფრთხოებასთან დაკავშირებით უწყებათშორისი კომისიის მეორე შეხვედრა სამი საათის განმავლობაში, დახურულ კარს მიღმა მიმდინარეობდა. კომისიის ხელმძღვანელმა, ნათია მეზრიშვილმა შეხვედრის შემდეგ განაცხადა, რომ 2020 წლის პირველი აპრილიდან თბილისში არასრულწლოვანთა სამმართველო შეიქმნება, რომელიც აღიჭურვება ყველა შესაბამისი ტექნიკით, მათ შორის სათვალთვალო კამერებით, ასევე გამოყოფილი იქნება გამოკითხვის ოთახები. 

ნათია მეზვრიშვილმა ასევე განაცხადა, რომ ჯანდაცვის, განათლების, იუსტიციისა და შინაგან საქმეთა სამინისტროებს, რომლებიც ამ ფორმატში მონაწილეობენ, კონკრეტული დავალებები მიეცათ. მაგალითად, იუსტიციის სამინისტრო იმუშავებს არასრულწლოვანთა მართლმსაჯულების კოდექსზე. ამ დრომდე კოდექსის მიხედვით, არასრულწლოვნის მოწმის სახით გამოკითხვის დროს ადვოკატის ჩართულობა სავალდებულო არ არის, თუმცა ნათია მეზვრიშვილი ამბობს, რომ ამ შეხვედრების შემდეგ პრობლემა გამოიკვეთა - რომ არასრულწლოვნები სწორედ უფლებადამცველების თანდასწრებით უნდა გამოიკითხონ. 

რაც შეეხება განათლების და ჯანდაცვის სამინისტროებს, მათ სოციალურ მუშაკთა აღწერასთან დაკავშირებით მიეცათ დავალებები. ნათია მეზვრიშვილი ამბობს, რომ ყველა უწყებას ზუსტად ერთი კვირა აქვს შესაბამისი ანგარიშების წარსადგენად. 

უწყებათაშორის სამუშაო ჯგუფს მთავრობის ადმინისტრაციის ხელმძღვანელი ნათია მეზვრიშვილი უძღვება. გასულ სხდომაზე ნათია მეზვრიშვილმა სამინისტროებს არასრულწლოვანთა უსაფრთხოების დაცვისა და განათლების სფეროებში არსებული პრობლემების აღიარებისკენ მოუწოდა. ოთხმა უწყებამ სისტემური რეფორმის დავალება პრემიერისგან 18 დეკემბერს მიიღო.

12 დეკემბერს, დიღმის მასივში მოზარდმა თვითმკვლელობა სცადა. შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. ადვოკატის თქმით, მოზარდზე დაკითხვის დროს ფსიქოლოგიური ზეწოლა განხორციელდა. მოზარდი 15 დეკემბერს საავადმყოფოში გარდაიცვალა. 

მოზარდის საქმეზე გამომძიებელი მარიანა ჩოლოიანი 15 დეკემბერს დააკავეს. მას პატიმრობა აქვს შეფარდებული.