ზურაბიშვილი: თავისუფალ ქვეყანაში ვცხოვრობთ და პროტესტის პროტესტი არასდროს მექნება

„თავისუფალ ქვეყანაში ვცხოვრობთ და პროტესტის პროტესტი არასდროს მექნება, - ამის შესახებ საქართველოს პრეზიდენტმა სალომე ზურაბიშვილმა გურიაში „ნაციონალური მოძრაობის“ წევრების მიერ გამართულ აქციასთან დაკავშირებით განაცხადა.

„არ ვიცი, ვინ შემოუშვეს და ვინ არა. სახალხო დღესასწაულია და ამიტომ ვულოცავ ყველას. ვინც რაიმეს აპროტესტებს, გააპროტესტოს, ეს არის თავისუფლება, ჩვენ ვცხოვრობთ თავისუფალ ქვეყანაში და მე პროტესტის პროტესტი არასდროს მექნება“ , - განაცხადა პრეზიდენტმა.

სალომე ზურაბიშვილმა გურიის მოსახლეობას კალანდობა მიულოცა.

„რადგანაც გურიაში ვართ, მინდა, ყველას გისურვოთ, მშვიდობა, მშვიდი წელი იყოს, ვიყოთ ერთიანნი, რაც არ უნდა განსხვავებული იყოს ჩვენი შეხედულებები, ერთმანეთის მიმართ ვიყოთ სიყვარულით, რადგან ეს არის ამ ქვეყნის ძალა, რომელიც მოდის საუკუნეების მანძილზე.

ძალიან ბევრი გავიარეთ, ბევრს გავივლით, მაგრამ ვერ გავივლით, თუ არ გვექნება ჩვენში ეს განცდა, რომ რაც არ უნდა ერთმანეთისგან განსხვავებულობა იყოს, მაინც გვაქვს უფრო მეტი საერთო, ვიდრე დასაყოფი.

ამას გთხოვთ ჟურნალისტებსაც, მე იმას კი არ გთხოვთ, რომ არ გამაკრიტიკოთ, მიდით და მაკრიტიკეთ, მაგრამ ვიცოდეთ, რომ ჩვენ ერთიანი მიზანი გაგვაჩნია, ამაში ღრმად ვარ დარწმუნებული და მინდა, ერთად ვიყოთ ამაში დარწმუნებული“ , - განაცხადა სალომე ზურაბიშვილმა.

გურიაში ჩასულ საქართველოს პრეზიდენტს ოპოზიცია აქციით დახვდა. „ნაციონალური მოძრაობის“ წევრებს იმ მუზეუმის ეზოში შესვლა სურდათ, სადაც ღონისძიებაზე პრეზიდენტს ელოდნენ.

საქართველოს პრეზიდენტი სალომე ზურაბიშვილი 13 იანვარს გურიის რეგიონს სამი დღით ეწვია.