მამუკა მდინარაძემ და NDI-ის ხელმძღვანელმა CRRC-საქართველოს მიმართ ნდობის საკითხი განიხილეს

საპარლამენტო უმრავლესობის ლიდერი მამუკა მდინარაძე საქართველოში NDI-ის ოფისის ხელმძღვანელს შეხვდა. 

როგორც მდინარაძემ ჟურნალისტებს განუცხადა, მმართველ გუნდს NDI-ის მიმართ რაღაც განსაკუთრებული უნდობლობა არ აქვს და ამ ინსტიტუტს პატივს სცემს.

„საქართველოში არის კონკრეტული მოცემულობა, რომ ისინი სამწუხაროდ ენდობიან CRRC-ის. ჩემი აზრით, ის ნდობას არ იმსახურებს. ამ საკითხზე იყო ბევრი საუბარი ხანგრძლივი შეხვედრის დროს.

სახეზე გვაქვს მოცემულობა, როდესაც „ქართული ოცნება“ ამომრჩეველთა ნახევრის მხარდაჭერას მოიპოვებდა ხოლმე, თუმცა რამდენიმე თვით ადრე გამოქვეყნებულ კვლევაში 15-პროცენტიანი მხარდაჭერა გვქონდა.

ბუნებრივია, CRRC-ი ჩვენი ნდობის ეტალონი ნამდვილად ვერ იქნება. ჩვენ შევთანხმდით, რომ მალევე გვექნება დეტალური განხილვა მსგავსი საკითხების და ისინი ამბობენ, რომ თუ ამ მიმართულებით არის ხარვეზები, ვიმსჯელოთ, თუნდაც ვიკამათოთ და გადაჭრის გზებზეც ვისაუბროთ“, - განაცხადა მამუკა მდინარაძემ.

თავის მხრივ, ლორა თორნტონმა აღნიშნა, რომ CRRC-საქართველო NDI-ის მხრიდან სრული ნდობითა და მხარდაჭერით სარგებლობს.

„ჩვენ გვქონდა ძალიან ღია, კონსტრუქციული და საინტერესო შეხვედრა, ღიად და გულწრფელად ვისაუბრეთ ძალიან ბევრ საკითხზე, მათ შორის იმ წუხილსა და კითხვებზე, რომელიც ბატონ მამუკას ჰქონდა ჩვენს კვლევებთან დაკავშირებით.

შევთანხმდით, რომ უფრო დეტალურად და სიღრმეებში განვაგრძობთ ამ საკითხებზე საუბარს.

ასევე ვისაუბრეთ იმ ზოგად სირთულეზე, შეცდომებსა თუ გაუგებრობებზე, რაც ხშირ შემთხვევაში ახლავს ხოლმე კვლევების მეთოდოლოგიას. ჩვენ განვაგრძობთ ბატონ მამუკასთან და მის გუნდთან ახლო თანამშრომლობას.

ასევე ვისაუბრეთ ჩვენ კვლევით პარტნიორზე, CRRC-საქართველოზე და კიდევ ერთხელ მინდა ხაზგასმით აღვნიშნო, რომ CRRC-საქართველო NDI-ის მხრიდან სრული ნდობითა და მხარდაჭერით სარგებლობს“, - განაცხადა ლორა თორნტონმა.

NDI-ის კვლევის მიხედვით, გამოკითხულთა 19% აცხადებს, რომ მის შეხედულებებთან ყველაზე ახლოს პოლიტიკური პარტიებიდან „ქართული ოცნება“ დგას. ამასთან, კითხვაზე „ხვალ რომ არჩევნები იყოს ვის მისცემდით ხმას“, გამოკითხულთა 56%-ს გადაწყვეტილი არ აქვს, 39%-მა იცის, ხოლო 3%-მა არ იცის, ვის მისცემდა ხმას.