გირჩი მონაწილეობას არ მიიღებს ოპოზიციის იმ შეხვედრებში სადაც გრიგოლ ვაშაძე იქნება

ზურაბ გირჩი ჯაფარიძე ნაციონალური მოძრაობის ერთ-ერთი ლიდერის, გრიგოლ ვაშაძის მიერ ერთ-ერთი სატელევიზიო ეთერით გაკეთებულ განცხადებას ეხმიანება. გრიგოლ ვაშაძემ განაცხადა, რომ პროპორციული არჩევნების მიღება, „ნაციონალური მოძრაობის“ დამსახურებაა. 

როგორც ზურაბ ჯაფარიძე აცხადებს, „გირჩი“ გააგრძელებს კონსულტაციებს „ნაციონალური მოძრაობის“ ადგილობრივ ლიდერებთან, მაგრამ არაფერზე დაელაპარაკებიან გრიგოლ ვაშაძეს. 

„გრიგოლ ვაშაძის გუშინდელ ჩართვას ვუსმინე ეკა კვესიტაძესთან. ყველას დიდი მადლობა, მაგრამ პროპორციული არჩევნების დადება კონკრეტულად ჩვენი, ნაციონალური მოძრაობის დამსახურებააო. არაფერი შეგეშალოთო. ჰოდა: გირჩი გააგრძელებს კონსულტაციებს ნაციონალური მოძრაობის ადგილობრივ ლიდერებთან (ისევე როგორც სხვა პარტიებთან) იმის თაობაზე, თუ როგორ უნდა შევცვალოთ ქვეყანა ივანიშვილის ხელისუფლებიდან წასვლის შემდეგ (როგორ დავშალოთ სისტემა, როგორ მოვახდინოთ ბოლშევიკების მიერ ჩამორთმეული ქონების რესტიტუცია) მაგრამ, ჩვენ არაფერზე დაველაპარაკებით გრიგოლ ვაშაძეს.

მათ შორის, ოპოზიციის ერთიანი საკონსულტაციო ფორმატის იმ შეხვედრებზე, რომელზეც ეს ადამიანი იქნება ნაციონალური მოძრაობის წარმომადგენელი და პარტიის პოზიციის გამხმოვანებელი, ჩვენ მონაწილეობას არ მივიღებთ. კიევიდან როგორ ჩანს არ ვიცი, მაგრამ აქ *** არავინ არ არის“, - წერს ზურაბ ჯაფარიძე საკუთარი ფეისბუქის გვერდზე.

„ქართულმა ოცნებამ“ ოპოზიციას 2020 წლის და მომდევნო წლების საპარლამენტო არჩევნების შერეული სისტემით ჩატარება შესთავაზა, სადაც მაჟორიტარების რაოდენობა 50-მდე შემცირდება.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

ოპოზიცია საერთაშორისო პარტნიორების ჩართულობით, მმართველ პარტიასთან მოლაპარაკებებს მართავს და მის მიერ შემუშავებულ კანონპროექტთან დაკავშირებით ეუთოს დასკვნას ელოდება. მოლაპარაკებების მესამე რაუნდზე, რომელიც 15 დეკემბერს გაიმართა, მმართველი გუნდი და ოპოზიცია მრავალმანდატიან ოლქებზე ვერ შეთანხმდნენ.