ჯაღმაიძემ განმარტა რატომ აუკრძალეს ანდრია სარიას მღვდელმსახურება

საპატრიარქოს საზოგადოებასთან ურთიერთობის სამსახურის ხელმძღვანელმა დეკანოზმა ანდრია ჯაღმაიძემ განმარტა მიზეზები, რატომო აუკრძალეს მღვდელმსახურება მღვდელ ანდრია სარიას, ამის შესახებ „რადიო თავისუფლება“ წერს.  

„იმის გამო, რომ მღვდელმა ანდრია სარიამ შენიშვნა არ გაითვალისწინა, მისმა მმართველმა მღვდელმთავარმა, საქართველოს კათოლიკოს-პატრიარქმა მიიღო ეს გადაწყვეტილება“, - ამბობს ანდრია ჯაღმაიძე.

შეკითხვაზე, რომელი განცხადება დაედო საფუძვლად პატრიარქის ბრძანებას, ჯაღმაიძე პასუხობს: „ბოლო დროის მის განცხადებებს გადახედეთ და იქ არის ასეთი გამონათქვამები:

„საპატრიარქო არის ყველაფერში დამნაშავე“; „პატრიარქის გარემოცვა ბანდაა“; „საპატრიარქო სახელმწიფოსთან ერთად არის ერთ-ერთი სადამსჯელო ორგანიზაცია“ და მსგავსი განცხდებები“.

ვინ მიიღო გადაწყვეტილება, მაშინ, როდესაც პატრიარქი არ იმყოფება თბილისში?

„გადაწყვეტილება მიიღო პატრიარქმა და საპატრიარქო ამზადებს ბრძანებას, რომელსაც უთანხმებს პატრიარქს და მისი ფაქსიმილიით მზადდება ეს ბრძანება. არის ხალხის კატეგორია, რომელიც, როცა აწყობს, ამბობს, რომ პატრიარქი იღებს პრეზიდენტზე უპირატეს გადაწყვეტილებას შეწყალება-არშეწყალებაზე, რაც მამალაძის შემთხვევაში მოვისმინეთ, ხოლო, როცა ააწყობთ, ამბობს, რომ პატრიარქმა ვერ მიიღო გადაწყვეტილება სარიასთან დაკავშირებით“, - ამბობს ანდრია ჯაღმაიძე.

ანდრია სარია პატრიარქთან შეხვედრას ითხოვს, რაზეც ჯაღმაიძე პასუხობს: „ჩემი აზრით, სანამ საჯაროდ გააკეთებდა ამხელა განცხადებებს, მანამდე უნდა ეზრუნა ამაზე, რომ პატრიარქს შეხვედროდა, თუმცა არ ვიცი პატრიარქი, რას გადაწყვეტს“. მისი თქმით, პატრიარქის გულმოწყალების ნიმუშია, რომ ამდენი ხნის განმავლობაში ანდრია სარიას ბევრი შესაძლებლობა ეძლეოდა იმისთვის, რომ მოენანიებინა.

„ის დანაშაული, რის გამოც მას მღვდელმსახურება შეუჩერეს გაცილებით მძიმე გადაწყვეტილების მიღების, განკვეთის საშუალებასაც იძლევა. ამ ფონზე ეს არის კიდევ ერთი შეღავათიანი გადაწყვეტილება“, - თქვა ჯაღმაიძემ.

მღვდელმსახურების შეზღუდვა გულისხმობს იმას, რომ ის ვერ წირავს, ვერ ჩაიბარებს აღსარებას და სხვა საიდუმლო მსახურებას ვერ შეასრულებს.

დღეს ცნობილი გახდა, რომ მღვდელმონაზონ ანდრია სარიას მღვდელმსახურება აეკრძალა. 

მღვდელმონაზონი ანდრია სარია ჭყონდიდის ეპარქიიდან 2019 წლის 13 დეკემბერს გაათავისუფლეს. მაშინ ეს გადაწყვეტილება მას ახალმა მიტროპოლიტმა მეუფე გრიგოლმა გააცნო.

ეპარქიიდან გათავისუფლებამდე რამდენიმე დღით ადრე ანდრია სარიამ გამოაქვეყნა ეროვნული არქივიდან 1982 წელს ამოღებული წერილი, რომელშიც საუბარია მამათმავლობის პრობლემაზე,  კერძოდ კი, მაშინდელი 5 მოქმედი ეპისკოპოსი მიმართავს პატრიარქს და ამ ცოდვით შეპყრობილ 3 ეპისკოპოსსა და 1 დაბალ სასულიერო იერარქს ამხელს.