ირაკლი კობახიძე: კონგრესმენების წერილში წერია, რომ ანაკლიის კონსორციუმის უკან აშშ იდგა, რაც არასწორია

საპარლამენტო უმრავლესობის წევრი, ირაკლი კობახიძე კონგრესმენების წერილში არსებულ ფაქტობრივ შეცდომებზე მიუთითებს. ირაკლი კობახიძემ გადაცემაში „დღის ქრონიკა“ ამის რამდენიმე მაგალითი დაასახელა. 

მისი თქმით, წერილში ერთ-ერთი ნაწილი ეხება ძალადობას მშვიდობიანი დემონსტრანტების წინააღმდეგ, რომელიც როგორც წერილში წერია, ასოცირებულია პროპორციული არჩევნების შესახებ კენჭისყრის ჩავარდნასთან.

„ანუ, გვეუბნებიან, რომ 14 ნოემბრის შემდეგ პოლიცია მშვიდობიანი დემონსტრანტების წინააღმდეგ ძალადობდა. თქვენ გახსოვთ, რომ 20 ივნისის შემთხვევაში იყოს ხელისუფლების გადატრიალების მცდელობა, რაც ერთმანეთის მიყოლებით აღიარეს ნიკა მელიამ, მიხეილ სააკაშვილმა, რასაც მოჰყვა გრიგოლ ვაშაძის ძალიან საინტერესო აღიარება იმის თაობაზე, რომ ყველაფრის უკან „ნაციონალური მოძრაობა“ იდგა. ეს აღიარებები და წამოცდენები არის ძალიან საინტერესო და ამას პასუხი გაეცემა ოქტომბრის არჩევნებში

რაც შეეხება 20 ივნისს, კონკრეტული ზომები იყო მიღებული არა მშვიდობიანი დემონსტრანტების, არამედ იმ ადამიანების წინააღმდეგ, რომლებიც ცდილობდნენ საქართველოს პარლამენტში შეჭრას. ძალა იყო გამოყენებული იმ ადამიანების წინააღმდეგ, რომლებიც პარლამენტის შენობაში იჭრებოდნენ.

ამას მოჰყვა მშვიდობიანი მანიფესტანტების ჯანმრთელობის დაზიანებაც, რაც იყო ყველაზე მძიმე. რაც შეეხება 14 ნოემბრის შემდეგ განვითარებულ მოვლენებს, პოლიციას არც ერთ შემთხვევაში არ უძალადია მშვიდობიანი დემონსტრანტების მიმართ. შესაბამისად, ამ წერილში არის ხარვეზი ამ მიმართულებით“, - განაცხადა ირაკლი კობახიძემ. 

მისივე შეფასებით, კიდევ ერთი ხარვეზი ანაკლიის პორტის საკითხს ეხება. 

„საუბარია ანაკლიის პორტის პოლიტიზირებაზე. ვინ ახდენს ამ საკითხის პოლიტიზირებას, კარგად ხედავს საზოგადოება - ის ადამიანები, რომლებმაც ვერ შეძლეს პროექტის განხორციელება.

თუ იყო ასეთი გლობალური სტრატეგიული ინტერესი, რაზეც ამ წერილშია საუბარი, კონსორციუმს ინვესტორის მოძიება არ გაუჭირდებოდა. ამ შემთხვევაშიც ფაქტები არის დამახინჯებული. 

ასევე წერია, რომ კონსორციუმის უკან იდგა აშშ, რაც ასევე არასწორია. პროექტის მხარდამჭერი პირველ რიგში არის საქართველოს კონსტიტუცია, სადაც წერია, რომ ანაკლიის პროექტი უნდა განხორციელდეს.

კონსტიტუციიდან გამომდინარე, ამ პროექტის მხარდამჭერები ვართ ჩვენ, მაგრამ აქ რაზეა საუბარი - მოცემულობის არასწორად შეფუთვა ხდება და საუბარი არის რაზე - რომ თითქოს ამ პროექტის განხორციელება ჩვენს მთავარ სტრატეგიულ პარტნიორს სურდა და ამისთვის იდგა სახელმწიფო კონკრეტული კონსორციუმის უკან, რაც არასწორია, რადგან აშშ, როგორც სახელმწიფო არ იდგა კონსორციუმის უკან. ეს იყო არსებითად ქართული კომპანია თავისი ქართველი ლიდერებით. ჯერ დაიწყეს დასავლური კომპანიების მოზიდვა, რაც ვერ მოახერხეს და შემდეგ გადავიდნენ სხვა კომპანიებზე და ესეც ვერ მოახერხეს“, - აღნიშნა ირაკლი კობახიძემ.   

რაც შეეხება სოციალური ქსელის გამოყენების თემას, მმართველი გუნდის წევრის შეფასებით, Facebook-ის შემთხვევაში ეწერა, რომ თითქოს „ქართული ოცნება“ აღვივებდა ანტიდასავლურ და ანტიდემოკრატიულ გრძნობებს.

„ეს ხომ ტყუილია, ასეთი კონტენტი არსად ვრცელდებოდა, Facebook-ში მილიონი ქართველია გაწევრიანებული და ყველა ხედავს, რა შინაარსი ვრცელდება“, - განაცხადა ირაკლი კობახიძემ.  

კიდევ ერთი თემა, რაზეც წერილშია საუბარი, სისხლის სამართლის ძველი საქმეების ხელახლა წამოწყებაა, ირაკლი კობახიძემ ამ საკითხზეც გაამახვილა ყურადღება.

„წერილში წერია - პოლიტიკური ფიგურები, მედია ოპერატორები, აქ საუბარია ძველ საქმეებზე. თუ იცით, ძველი საქმე, რომელიც მედია ოპერატორებზე არის აღძრული?! არის ერთადერთი საქმე, რომელიც ეხება ნიკა გვარამიას და ეს არ არის ძველი. ანუ, აქ ტყუილია გაპარული“, - განაცხადა ირაკლი კობახიძემ. 

მან ამერიკული კომპანიების შევიწროების თემაზეც ისაუბრა, რომელშიც „ფრონტერა“ იგულისხმება. 

„ეს სრული საოცრებაა. შეგიძლიათ, „ნაციონალური მოძრაობის“ ლიდერების განცხადებები ამოიღოთ, თუ რას ფიქრობენ ისინი „ფრონტერაზე“, - აღნიშნა ირაკლი კობახიძემ.

რაც შეეხება ორ პარტიულ მხარდაჭერას, ირაკლი კობახიძის განცხადებით, ეს აშშ-ის მხრიდან ფიქსირდება კონკრეტულ დოკუმენტებში და ამას არაფერი ემუქრება იქედან გამომდინარე, რომ ქართულ-ამერიკული ურთიერთობები ასეთ მაღალ დონეზე არასდროს ყოფილა.

ოთხმა კონგრესმენმა პრემიერმინისტრ გიორგი გახარიას წერილით 22 იანვარს მიმართა. 

გარდა ამისა, რესპუბლიკელი კონგრესმენი მარკუეინ მალინი გიორგი გახარიასადმი 19 იანვარს გაგზავნილ წერილში „საქართველოს დემოკრატიული ღირებულებებისგან გადახვევითა და ეკონომიკის გაუარესებით“ შეშფოთებულია.

მანამდე კი ამერიკელმა კონგრესმენებმა, ადამ კინზინგერის თაოსნობით, საქართველოს პრემიერმინისტრს წერილით 2019 წლის 16 დეკემბერსაც მიმართეს და პარლამენტის მიერ პროპორციულ საარჩევნო სისტემაზე უარის თქმის გამო შეშფოთება გამოთქვეს.