კახიძე: ხელისუფლებას დათმობაზე წასვლა მოუწევს

ხელისუფლებას გარკვეულ დათმობაზე წასვლა მოუწევს, - ამის შესახებ „ევროპული საქართველოს“ ერთ-ერთმა ლიდერმა ოთარ კახიძემ საარჩევნო სისტემის ცვლილების შესახებ დაგეგმილ მორიგ შეხვედრასთან დაკავშირებით განაცხადა.

დიპლომატიური კორპუსის შუამავლობით ხელისუფლებისა და ოპოზიციის რიგით მეხუთე შეხვედრა უახლოეს მომავალში უნდა გაიმართოს. კახიძე ელის, რომ ამ შეხვედრაზე მმართველი გუნდი წარადგენს საარჩევნო სისტემის ისეთ ვერსიას, რომელშიც დაცული იქნება პროპორციულობის პრონციპი, რაც გულისხმობს პოლიტიკური ძალის მიერ არჩევნებში მიღებული ხმების პროპორციული რაოდენობით შესვლას პარლამენტში.

„ხელისუფლებას მოუწევს გარკვეულ დათმობაზე წასვლა, თუ გონიერების მინიმალური ნატამალი მაინც შერჩათ. ისეთი მოდელი წარმოადგინონ, რომელშიც ასახული იქნება პროპორციულობის პრინციპი, ანუ, რა მხარდაჭერასაც მიიღებს პოლიტიკური ძალა არჩევნებში, ის წარმომაგენლობა უნდა ჰყავდეს პარლამენტში - ეს პრინციპი უნდა იყოს დაცული. მათ მიერ წარმოდგენილ ვერსიაში ეს პრინციპი დაცული არაა, ამიტომ, თუ შეჯერდებიან იმ მოდელზე, რომელშიც ეს პრინციპი დაცული იქნება, ოპოზიცია, რა თქმა უნდა, ამას გაიზიარებს.

მათი შემოთავაზებული მოდელი 100/50-ზე არ ასახავს იმ პრინციპს. 27%-იანი მხარდაჭერით თეორიულად შესაძლებელია, რომ პარტიამ მთავრობა დააკომპლექტოს და ეს ნორმალურია? რა თქმა უნდა, არა. შესაბამისად, მოდელი, რომელშიც პროპორციული პრინციპი იქნება დაცული, 50 თუ არა 45%-იანი მხარდაჭერა მაინც უნდა ჰქონდეს პოლიტიკურ ძალას, რომ მთავრობის დაკომპლექტებაზე პრეტენზია განაცხადოს. თუ ამ პრინციპს ასახავენ, ამის შემდეგ უკვე ოპოზიცია მორიგ რაუნდზე მზად იქნება შემდგომი ნაბიჯებისთვის. ამ რეჟიმში ყოფნა ჩვენი თვითმიზანი არაა. ჩვენი მიზანია ცივილური ოპონირება ხელისუფლებასთან და მათი დამარცხება არჩევნებზე“, - განაცხადა კახიძემ.

„ქართულმა ოცნებამ“ ოპოზიციას 2020 წლის და მომდევნო წლების საპარლამენტო არჩევნების შერეული სისტემით ჩატარება შესთავაზა, სადაც მაჟორიტარების რაოდენობა 50-მდე შემცირდება.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

ოპოზიცია საერთაშორისო პარტნიორების ჩართულობით, მმართველ პარტიასთან მოლაპარაკებებს მართავს და მის მიერ შემუშავებულ კანონპროექტთან დაკავშირებით ეუთოს დასკვნას ელოდება. მოლაპარაკებების მესამე რაუნდზე, რომელიც 15 დეკემბერს გაიმართა, მმართველი გუნდი და ოპოზიცია მრავალმანდატიან ოლქებზე ვერ შეთანხმდნენ.