ლევან იზორიამ მის ძმასთან დაკავშირებული ინციდენტი განმარტა

დაზვერვის ყოფილი ხელმძღვანელი ლევან იზორია აცხადებს, რომ მისი ძმის, ვახტანგ იზორიასა და პოლიციელ, გიორგი დვალიშვილს შორის მომხდარ ინციდენტზე მან მისი ამოწურვის შემდეგ გაიგო და ამ საკითხში არ ჩარეულა.

მისივე განმარტებით, როდესაც გაიგეს, რომ არანაირი დანაშაული არ იკვეთებოდა, მისი ძმა გაუშვეს. 

იზორიას განმარტებით, როდესაც მისი ძმა პარკირებას ახდენდა, მიმართეს საკმაოდ უხეში ფორმით, რაზეც მას ჰქონდა მოწოდება, რომ მოქცეოდნენ უფრო კორექტულად, რის შემდეგაც არა სიტუაციის განმუხტვას, არამედ აგრესიის ხელშეწყობას ჰქონდა ადგილი.  

„ჩემი ჩარევა არ მომხდარა, ბორკილებდადებული ვერ დამირეკავდა“, - განაცხადა ლევან იზორიამ POSTV-ს ეთერში. 

მისივე თქმით, მისი ძმის ტერიტორიიდან განრიდება მოხდა. 

„როდესაც გავიგე ამ ინციდენტის შესახებ, არ გამჩენია უკმაყოფილების განცდა რომელიმე პოლიციელის მიმართ. არასდროს მქონია შემხებლობა. ამას ის ფაქტიც მოწმობს, რომ ეს ადამიანი სისტემაში დაწინაურდა, მას ჰქონდა ყველანაირი პირობა თავისი საქმიანობის კეთილსინდისიერად განხორციელებისთვის. ზეწოლა, ჩარევა, დასჯა, ან მუქარა გამორიცხული და ყოვლად მიუღებელია”, - განაცხადა იზორიამ.

„მეტიც შეიძლება ეჭვი გამჩენოდა ამ კონკრეტულ ინციდენტში პოლიციელის მოქმედების მართლზომიერებაში, ანუ რამდენად სამართლებრივად მოხდა დაკავება, რა იყო დაკავების საფუძველი, თუმცა მე არ ვიქნები დღეს იმ როლში, რომ ერთი მხარე გავამართლო.

ხელბორკილებს ადებენ ადამიანს, როცა აკავებენ, როცა დანაშაულის ნიშნებს ხედავ. როცა ადამიანი არც ფიზიკურად გეხება, არც შეურაცხყოფას გაყენებს, პირიქით, მოგიწოდებს კორექტულობისკენ, ეს კამათი გადადის აგრესიაში. მიუხედავად იმისა, რომ დანაშაულის ნიშნები არ არის, აძლევ ასეთ კვალიფიკაციას, რომ უნდა დააკავო”, - განაცხადა იზორიამ.

მისივე თქმით, ის რომ, ადამიანი ემოციას, აგრესიას გამოხატავს, ლამაზი არ არის.

„პირველ რიგში კი, ჩემთვის, ვინც განსაკუთრებული პატივისცემით და მოწიწებით ვარ პოლიციელების მიმართ განწყობილი, ჩემ ძმასთან ერთად”, - აღნიშნა იზორიამ.

იზორიას თქმით, მისი ძმის აგრესია არ გასცილებია სამართლებრივ ჩარჩოს, ხელბორკილის დადების შემდეგ კი გაღიზიანების ხარისხი გაიზარდა.

„ამას მოჰყვა მოჭარბებული ემოცია, რაც უსიამოვნოა. დედაჩემმაც ჩათვალა საჭიროდ, რომ განცხადება გაეკეთებინა. ეს არ იყო მარტივი. მოჰყვა ზღვა შეურაცხყოფა - ისეთ სივრცეში ვცხოვრობთ, რომ ადამიანის ასაკის პატივისცემაზე არავინ ფიქრობს. მანაც იცოდა ეს, თუმცა გადაწყვიტა საზოგადოებისთვის აეხსნა მიზეზი“, - განაცხადა ლევან იზორიამ. 

როგორც აღმოჩდა ინციდენტის ადგილას იზორიას მაშინდელი მძღოლი, ყოფილი მაღალჩინოსნის თქმით, მისი ყოფილი მძღოლი ვახტან იზორიასთან ბავშვობიდან მეგობრობს და “როცა ახლობლების საქმის კურსში ჩაყენებაზეა საუბარი, პირველ რიგში, მან გაიგო და ის დაინტერესდა”.

„ჩემი ძმა სრულწლოვანი ადამიანია, მე მის ქმედებაზე პასუხს ვერ ვაგებ ვერც დღეს და ვერც მომავალში, მათ შორის მის აგრესიაზე. თუმცა ამ შემთხვევაში, ეს არ ნიშნავს, რომ მე ძმას ვემიჯნები, ან მის ინტერესებს არ დავიცავ. როგორც მე ვარ კანონის წინაშე თანასწორი, ისეა ჩემი ძმა“, - განაცხადა ლევან იზორიამ. 

ამ ინციდენტის დროს, 2014 წელს, ლევან იზორია შს მინისტრის მოადგილე იყო.

გიორგი დვალიშვილმა ერთ-ერთ არხს მიაწოდა 2014 წელს გადაღებული კადრები, სადაც ასახულია ვახტანგ იზორიას დაკავება და კამათი პოლიციელებთან.