იოსებ გოგაშვილი: დუმილის დარღვევის დრო დადგა

ყველამ უნდა გაიგოს, როგორც საზღვარგარეთ, ასევე საქართველოში, რომ ამ „ისლამური სახელმწიფოს“ ტერორისტების უკან იდგა და დგას საქართველოს „მთავარი“ ოპოზიციური პარტია „ნაციონალური მოძრაობა“, - ამის შესახებ Facebook-ზე სუსის უფროსის ყოფილი მოადგილე სოსო გოგაშვილი წერს.

„ვანო, გილოცავ!!! იცოდე, შენს მიერ დაღვრილი სისხლი, რომელიც შენი ქვეყნის და შენი ოჯახის გადასარჩენად დაღვარე, არ ყოფილა ტყუილად დაღვრილი, სასუფეველი დაგიმკვიდროს უფალმა, გმირო. შეხვედრამდე ძმობილო!

სისხლის სამართლის საქმეები შეწყდა სუს-ის თანამშრომელების მხრიდან დანაშაულის არარსებობის გამო და ასევე ტერორიზმში ეჭვმიტანილის გარდაცვალების გამო. ასევე გრძელდება სისხლის სამართლის საქმე ტერორისტულ აქტებსა, თუ ტერორისტულ დანაშაულში სხვა პირების შესაძლო მონაწილეობაზე.

ქვეყანას ავარიდეთ საშინელი სისხლიანი ტერორისტული აქტების სერია, განადგურდა მსოფლიოში საშიში ტერორისტები და ვინც გადაურჩა სიკვდილს, ისინი ვერ გადაურჩნენ მართლმსაჯულებას, ასე იმარჯვებს სიმართლე! წინაა სტრასბურგი, მაგრამ ეჭვი არ მეპარება, რომ იქაც იზეიმებს სიმართლე, რადგან ტერორისტი მსოფლიოს პრობლემაა და არა მარტო საქართველოსი, სიმართლე კი ერთია!

ახლა კი და დადგა დუმილის დარღვევის დროც, მე ვიწყებ ამ საქმის შესახებ ყველა არსებული მტკიცებულების და ფაქტების თარგმნას და მომზადებას ჩვენი უცხოელი სტრატეგიული პარტნიორებისთვის გასაგზავნად და პირადად გადასაცემად, ვაშინგტონიდან დაწყებული ბრიუსელით და სტრასბურგით დამთავრებული. ყველამ უნდა გაიგოს, როგორც საზღვარგარეთ ასევე საქართველოში, რომ ამ „ისლამური სახელმწიფოს“ ტერორისტების უკან იდგა და დგას საქართველოს „მთავარი“ ოპოზიციური პარტია „ნაციონალური მოძრაობა“. ეს არის ჩემი ახლანდელი მთავარი მიზანი, რომ ყველას დავანახო, რა დგას სინამდვილეში ამ პოლიტიკური პარტიის პოლიტმიზნების მიღწევის უკან და რა მეთოდებით ცდილობენ ისინი ხელისუფლებაში დაბრუნებას. ამას მე ყველას დავუგზავნი და გავაგებინებ. ასევე იგეგმება საერთაშორისო უსაფრთხოების, ანტიტერორისტული კონფერენციების მოწყობა, უცხოელ ანალიტიკოსებთან ერთად, როგორც საქართველოს სხვადასხვა კუთხეში, ასევე ევროპასა და ამერიკაში, სადაც გავაკეთებ პრეზენტაციებს და დავდებ ფაქტებს „ნაციონალური მოძრაობის“ და ISIS-ის წევრი ტერორისტების ალიანსზე.

თქვენ აგზავნით ცრუ რეპორტებს და მაგარი გგონიათ თავები, ახლა ნახავთ გოგაშვილს რა შეუძლია და რეპორტები როგორი უნდა იყოს ქვეყნის უსაფრთხოების დასაცავად და არა დასაღუპად... ამას მალე გაგრძნობინებთ, თქვე წურბელებო.

PS ასევე მივმართავ იმ რეპორტიორებს და ჟურნალისტებს, ვისაც პრეტენზია გაქვთ, რომ ხართ პროფესიონალები და გაქვთ გამოცდილება ჟურნალისტური გამოძიების წარმართვაში, ასევე ხართ პატრიოტები. გთავაზობთ, ჟურნალისტურ გამოძიებას ამ საქმის შესახებ, სადაც საქართველოს მოსახლეობას და ასევე ჩვენს უცხოელ მეგობრებს, ნათლად ვაჩვენებთ, რა მოხდა, როგორ მოხდა და ვინ დგას ამის უკან. ვიცი თემა რთული და სარისკოა, მაგრამ საინტერესოცაა, დამერწმუნეთ. მასალები და პროდიუსინგი ჩემზე იყოს. პასუხი, ყველა კითხვაზე იქნება“, - წერს გოგაშვილი.

დამატებითი ინფორმაციის მისაღებად imedinews-ი გოგაშვილს დაუკავშირდა. როგორც ჩვენთან საუბარში სუსის უფროსის ყოფილმა მოადგილემ განაცხადა, „ნაციონალური მოძრაობა“ წლების განმავლობაში თანამშრომლობდა „ისლამური სახელმწიფოს“ წარმომადგენლებთან და ხელისუფლებაში დასაბრუნებლად არაფერზე დაიხევს უკან.

„ეს ჰაერიდან მოტანილი სიტყვები არაა და ეს უბრალოდ ეფექტის მოსახდენად არ დამიწერია. მაქვს გარკვეული მტკიცებულებები და ფაქტები. აქედან გამომდინარე, ვგეგმავ, რომ მოსახლეობისთვის მაქსიმალურად ადვილად აღსაქმელად წარმოვაჩინო ეს ინფორმაცია. ჩემი შეხედულებით, „ნაციონალური მოძრაობა“ ტერორისტული ორგანიზაციაა და ამის მტკიცების სრული საფუძველი მაქვს. რა თქმა უნდა, ეს იმდენად ვრცელი და მნიშვნელოვანი მასალაა, რომ სატელეფონო ინტერვიუში ან ერთ რომელიმე ბრიფინგში ვერ ჩაეტევა, ამიტომ ამ მასალის პრეზენტაციას ეტაპობრივად მოვახდენ.

ეს კომუნიკაცია „ისლამურ სახელმწიფოს“ წარმომადგენლებსა და „ნაციონალურ მოძრაობას“ შორის წლების განმავლობაში მიმდინარეობდა და მათთვის ასეთი ქმედებები მიუღებელი არაა, მთავარია, თავის მიზანს მიაღწიონ. მათ არც საქართველოს მოსახლეობა, არც მათი ეკონომიკური მდგომარეობა და არც ქვეყნის უსაფრთხოების ინდექსი აინტერესებთ. ყველაფერს გადათელენ და ყველას უფლებას შელახავენ, ოღონდ ხელისუფლებაში დაბრუნდნენ. ყოველდღიურად ისინი ისეთ ნაბიჯებს დგამენ, რომ აზიანებენ არა მხოლოდ ხელისუფლებას და მთავრობას, არამედ მთელ ქვეყანას. 

ამ მასალების მომზადებას დიდი დრო არ დასჭირდება, მოუმზადებელი არ ვარ. ბოლო წლების განმავლობაში სწორედ ამ ინფორმაციის მოგროვებით ვიყავი დაკავებული. თუ საგამოძიებო ორგანოებს დააინტერესებს ეს ინფორმაცია, მათაც მივაწვდი. მინდა, რომ უცხოელმა პარტნიორებმა და ჩვენმა საზოგადოებამ ამ პოლიტიკური პარტიის რეალური სახე დაინახოს. ეს ხანმოკლე პროცესი არ იქნება, თუმცა, შეიძლება სწრაფი ეფექტიც ჰქონდეს“, - განაცხადა გოგაშვილმა.

თბილისის პროკურატურამ თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე​ გამოძიება 28 იანვარს შეწყვიტა. რაც შეეხება თავად სუს-ის კონტრტერორისტულ ცენტრში მიმდინარე სისხლის სამართლის საქმეს, მასზე გრძელდება გამოძიება დანაშაულში ჩართული სხვა პირთა დადგენა-მხილების მიზნით.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.