არჩილ თალაკვაძე პროპორციულზე: ოპოზიციამ ეს შესაძლებლობაც ჩაშალა და დესტრუქცია გააგრძელა

პარლამენტის თავმჯდომარის, არჩილ თალაკვაძის განცხადებით, მმართველ პარტიას ჰქონდა მოლოდინი, რომ ოპოზიციისთვის პროპორციული სისტემის შეთავაზებით თანხმობა შედგებოდა, „თუმცა ოპოზიციამ ეს შესაძლებლობაც ჩაშალა და დესტრუქცია გააგრძელა“. ამის შესახებ არჩილ თალაკვაძემ საზოგადოებრივი მაუწყებლის ეთერში განაცხადა. ინფორმაციას პარლამენტის პრესსამსახური ავრცელებს.

„გვქონდა მოლოდინი, რომ ოპოზიციისთვის პროპორციული სისტემის შეთავაზებით შეთანხმება შედგებოდა, შევძლებდით თანამშრომლობას, სიტუაცია განიმუხტებოდა და ეს იქნებოდა ქვეყნის ინტერესებისთვის გაერთიანების წერტილი, თუმცა ოპოზიციამ 20 ივნისის შემდეგაც გააგრძელა დესტრუქცია, ქუჩის პროცესები და დაპირისპირება, ჩვენი თანაგუნდელების მიმართ მძიმე შეურაცხყოფა“,- განაცხადა თალაკვაძემ. 

არჩილ თალაკვაძის თქმით, აშკარად გამოჩნდა, რომ ოპოზიციას სურდა დესტაბილიზაცია და არა პროპორციული არჩევნები.

„აშკარად გამოჩნდა, რომ ოპოზიციის დიდი ნაწილი არათუ თანამშრომლობისთვის არის მზად, არამედ პირიქით - ყველა გზას ეძებს, რომ საარჩევნო ყუთის გვერდის ავლით მიაღწიოს ცვლილებებს, რასაც ვერ დავუშვებთ“, - განაცხადა პარლამენტის თავმჯდომარემ.

დღეს „ლეიბორისტული პარტიის“ ოფისში ოპოზიციის ლიდერები შეიკრიბნენ. შეხვედრის შემდეგ გიგი უგულავამ განაცხადა, რომ ოპოზიციამ იმავე დღეს უარყო მმართველი პარტიის შეთავაზება 100/50-ის სისტემაზე, რა დღესაც ის ოპოზიციას გააცნეს. ოპოზიცია 4 თებერვალს პარლამენტთან სირცხვილის კორიდორის მოწყობას გეგმავს. 

„ქართულმა ოცნებამ“ ოპოზიციას 2020 წლის და მომდევნო წლების საპარლამენტო არჩევნების შერეული სისტემით ჩატარება შესთავაზა, სადაც მაჟორიტარების რაოდენობა 50-მდე შემცირდება.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

ოპოზიცია საერთაშორისო პარტნიორების ჩართულობით, მმართველ პარტიასთან მოლაპარაკებებს მართავს და მის მიერ შემუშავებულ კანონპროექტთან დაკავშირებით ეუთოს დასკვნას ელოდება. მოლაპარაკებების მესამე რაუნდზე, რომელიც 15 დეკემბერს გაიმართა, მმართველი გუნდი და ოპოზიცია მრავალმანდატიან ოლქებზე ვერ შეთანხმდნენ.