ყაზბეგიდან თბილისში ინფექციურ საავადმყოფოში ჩინელი ტურისტების ჯგუფი გადაჰყავთ

თბილისის ინფექციურ საავადმყოფოში ყაზბეგიდან ჩინეთის 9 მოქალაქე სასწრაფო დახმარების მანქანებით გადმოჰყავთ, რომელთა შორისაც ორი ბავშვიც არის. რამდენიმე მათგანს მაღალი ტემპერატურა და ვირუსისთვის დამახასიათებელი ნიშნები აქვს. 

არსებული ინფორმაციით, ჩინეთიდან ტურისტთა ჯგუფი 21 იანვარს აზერბაიჯანში ჩავიდა, იქიდან კი რამდენიმე დღეში შემოვიდა საქართველოში. დაავადებათა კონტროლის ეროვნული ცენტრის სამეცნიერო საბჭოს თავმჯდომარის პაატა იმნაძის თქმით, ტურისტები „საეჭვო არ არიან, მაგრამ მეთვალყურეობის ქვეშ არიან და ყველაფერს მაინც ვიკვლევთ“. 

დღეს ოფიციალურად ითქვა, რომ ჩინეთის ყველა პროვინციაში კორონავირუსის შემთხვევები დადასტურდა. ამასთან, აღსანიშნავია, რომ ვირუსის ინკუბაციის პერიოდი 5-დან 14 დღემდეა. 

ბოლო მონაცემებით, ფატალურმა ვირუსმა ჩინეთში 170 ადამიანი იმსხვერპლა, ინფიცირებულთა რაოდენობამ კი 7700-ს გადააჭარბა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი უკვე დაფიქსირდა ჩინეთის გარეთ: ტაილანდში, აშშ-ში, სინგაპურში, ჰონგ-კონგში, ნეპალში, ავსტრალიაში, ტაივანზე, მალაიზიაში, იაპონიაში, საფრანგეთში, სამხრეთ კორეაში, ვიეტნამსა და კანადაში.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთის ხელისუფლებამ პეკინში ახალი წლისადმი მიძღვნილი ღონისძიებები გააუქმა.

ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.