ოპოზიცია 4 თებერვლიდან აქციებს და პარლამენტის პიკეტირებას აანონსებს

„ევროპული საქართველოს“ ერთ-ერთი ლიდერის, სერგი კაპანაძის განცხადებით, თუ ხელისუფლება საარჩევნო სისტემას არ შეცვლის, ოპოზიცია მწვავე პროტესტის, პიკეტირების და აქციების გაგრძელებას აპირებს. ასევე კაპანაძის თქმით, არსებობს ოპოზიციის გეგმა „ბ“-ც. ამის შესახებ სერგი კაპანაძემ ჟურნალისტებს განუცხადა.

მისი თქმით, ოპოზიცია ელოდება მმართველ გუნდთან საარჩევნო საკითხებთან დაკავშირებით შემდეგი რაუნდის დანიშვნას, რომლის თარიღსაც მხარეებს საერთაშორისო პარტნიორები შესთავაზებენ.

„ყველას უნდა გვესმოდეს, რომ მთავარი ამოცანა ამ შეხვედრებზე არის ისეთ საარჩევნო სისტემებზე შეთანხმება, რომელიც უზრუნველყოფს ხალხის პროპორციულ და სამართლიან წარმომადგენლობას პარლამენტში. შესაბამისად, ნებისმიერი წინადადება, რომელიც ამ მიზანს მოემსახურება ჩვენთვის არის მისაღები“,- განაცხადა სერგი კაპანაძემ. 

„ოპოზიცია აპირებს, რომ აქციები, პიკეტირება, მწვავე პროტესტი განაგრძოს... ხვალ ვაპირებთ მოვაწყოთ „სირცხვილის კორიდორი“ პარლამენტის წინ.. ეს არის ქვეყანაში არსებული განწყობის გამოვლენა და შესაბამისად, ჩვენ არ ვაპირებთ გავჩერდეთ. ამ ეტპზე ასევე გაგრძელდება, პარლამენტის ბოიკოტირების რეჟიმი, თუმცა ჩვენ მზად ვართ, მივიღოთ მონაწილეობა ხელისუფლებასთან შეხვედრებში, რომ იქნებ, შევთანხმდეთ საარჩევნო სისტემაზე“, - თქვა კაპანაძემ. 

„ქართულმა ოცნებამ“ ოპოზიციას 2020 წლის და მომდევნო წლების საპარლამენტო არჩევნების შერეული სისტემით ჩატარება შესთავაზა, სადაც მაჟორიტარების რაოდენობა 50-მდე შემცირდება.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

ოპოზიცია საერთაშორისო პარტნიორების ჩართულობით, მმართველ პარტიასთან მოლაპარაკებებს მართავს და მის მიერ შემუშავებულ კანონპროექტთან დაკავშირებით ეუთოს დასკვნას ელოდება. მოლაპარაკებების მესამე რაუნდზე, რომელიც 15 დეკემბერს გაიმართა, მმართველი გუნდი და ოპოზიცია მრავალმანდატიან ოლქებზე ვერ შეთანხმდნენ.