მამუკა მდინარაძე: უგულავას საქმეზე სასამართლოს გადაწყვეტილება ოპოზიციამ დიალოგის ჩასაშლელად გამოიყენა

დიალოგის მთელი ოთხი რაუნდის განმავლობაში ვხედავდით, რომ მათი მიზანი არ იყო კომპრომისზე წამოსვლა და როგორც კი პირველივე საბაბი ნახეს, იმ წუთასვე ააყირავეს მოლაპარაკებების მაგიდა, სასამართლოს გადაწყვეტილება გამოიყენეს ამ პოლიტიკური კონტენტის შესაქმნელად,- ამის შესახებ პარლამენტის ვიცე-სპიკერმა, მამუკა მდინარაძემ „დღის ქრონიკის“ პირდაპირ ეთერში განაცხადა.

მამუკა მდინარაძის შეფასებით, ოპონენტებმა გიგი უგულავასთვის პატიმრობის შეფარდების პოლიტიზირება დიალოგის ჩასაშლელად მოახდინეს.

„მთელი ოთხი რაუნდის განმავლობაში ვხედავდით, რომ მათი მიზანი არ იყო კომპრომისზე წამოსვლა“, - განაცხადა პარლამენტის თავმჯდომარის მოადგილემ.

„ისინი ამბობენ, რომ არ აინტერესებთ სამართლებრივი მხარე, რომ ეს უკვე პოლიტიკაა. სამართლებრივი მხარე იმიტომ არ აინტერესებთ, რომ რაღაცებს იტყუებიან“, - აღნიშნა მამუკა მდინარაძემ.

პარლამენტის თავმჯდომარის მოადგილე ამერიკის საელჩოს განცხადებასაც გამოეხმაურა. მისი შეფასებით, სასამართლოს მიერ მიღებული გადაწყვეტილების დრო და კონტექსტი „იყო ძალიან ცუდი“, თუმცა, ვიცე-სპიკერი ამბობს, რომ სასამართლოს თავისი დღის წესრიგი აქვს და სამართალწარმოება არ უნდა გაჩერდეს იმიტომ, რომ საარჩევნო წელია.

„დრო და კონტექსტი იყო ძალიან ცუდი, თუმცა, სასამართლოს აქვს თავისი დღის წესრიგი და იმის გამო, რომ საარჩევნო წელია, სასამართლო და სამართალწარმოება გაჩერდეს, ეს იქნება უბედურება და არა ის, რომ სამართალწარმოება მიდის და განაჩენი გამოდის. მერე ვილაპარაკოთ, ეს განაჩენი სად საფუძვლიანია და სად არა, ამაზე ვილაპარაკოთ სამართლებრივ ნაწილში, მაგრამ ის , რომ ვინმემ მოინდომოს მართლმსაჯულების გაჩერება იმიტომ, რომ ახლა საარჩევნო წელია - დაუშვებელია. აპელირებენ იმაზე, რომ სასამართლო თითქოს გავლენის ქვეშ არის და ამ დროს მოგვიწოდებენ, რომ სასამართლო მოვაქციოთ გავლენის ქვეშ. ანუ, დავრეკოთ, ზეწოლა მოვახდინოთ“, - განაცხადა მამუკა მდინარაძემ.

უზენაესმა სასამართლომ თბილისის ყოფილი მერი ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. 

პროკურატურა გიგი უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლაგვას ედავებოდა. 2018 წელს საქალაქო სასამართლომ ყოფილ მერს აღნიშნულ საქმეზე 1 წლითა და 3 თვით თავისუფლების აღკვეთა შეუფარდა, თუმცა სხვა საქმეზე გამოტანილმა განაჩენმა ახალი განაჩენი შთანთქა და სასამართლომ სასჯელი მოხდილად ჩაუთვალა.

გიგი უგულავა ე.წ. მატროსოვის ციხეში 10 თებერვალს გადაიყვანეს.