გია ვოლსკი: ასოცირების კომიტეტის სხდომის რეზოლუციის გარეშე დასრულება ასოცირების ხელშეკრულებას არ შეაფერხებს

ევროკავშირი-საქართველოს ასოცირების კომიტეტის სხდომის რეზოლუციის გარეშე დასრულების გამო ასოცირების ხელშეკრულებას შეფერხება არ შეექმნება, - ამის შესახებ პარლამენტის ვიცესპიკერმა გია ვოლსკიმ „დღის ქრონიკაში“ განაცხადა.

მისი თქმით, ეს ხელშეკრულება გაცილებით მეტ დონეზე მოქმედებს და ევროკავშირის ქვეყნების პირველ პირებთან და სპეცსამსახურებთან ურთიერთობას მოიცავს.

„ეს თემა დღის წესრიგში არანაირად არ დადგება. ასოცირების ხელშეკრულება არ არის მხოლოდ შემოფარგლული გარკვეული ვალდებულებებით, რომლებსაც ჩვენ პირნათლად ვასრულებთ. ამის იქით არის კიდევ საგანგებო პოლიტიკური მნიშვნელობის თემები. თან ეს საპარალამენტო ფორმატს არ მოიცავს მხოლოდ. აქ არის სერიოზული პოლიტიკური ურთიერთობები ევროკავშირის ქვეყნებთან საგარეო საქმეთა მინისტრების და პირველი პირების დონეზე და თუნდაც სპეცსამსახურების დონეზე და ყველა სხვა სტრუქტურების დონეზე“, - განაცხადა ვოლსკიმ.

„ქართული ოცნების“ ერთ-ერთმა ლიდერმა აღნიშნა, რომ ამ ეტაპზე მმართველი გუნდი და ოპოზიცია ევროპარლამენტს საასპარეზო სივრცედ იყენებენ.

„შეიძლება არასწორია ამ საკითხის ასე დაყენება, მაგრამ რეალობაა და მოცემულობაა და არამარტო ჩვენ, არამედ ევროპარლამენტარების გარკვეული ნაწილი ამას მხარს უჭერს, რომ ამ თემაზე უნდა იყოს საუბარი. მაგრამ როდესაც ადამიანი გამოდის და იქიდან საზოგადოებას ატყუებს და სიცრუეს აწვდის იმის თაობაზე, რომ ჩავარდა ეს რეზოლუცია, იმიტომ რომ ცალ მხარეს დარჩნენ პროევრო-პროდასავლელი ნაცმოძრაობა და ევროკავშირი და აქეთ ჩვენ საცოდავად ვერ გავიტანეთ ეს საკითხი აი ეს არის პრობლემა. აი ეს სიცრუა პრობლემა“, - თქვა ვოლსკიმ.

მისივე თქმით, რეზოლუციის ტექსტში გიგი უგულავას საკითხის დამატება მიზანშეწონილი არ იქნებოდა, იმის გათვალისწინებით, რომ მმართველი გუნდმა ევროპარლამენტს ფაქტების შემსწავლელი მისიის გაგზავნა სთხოვა. ვოლსკიმ ასევე აღნიშნა, რომ ამ ფორმატის რეზოლუციაში „ნაციონალური მოძრაობის“ მიერ შეტანილი ცვლილებები არასოდეს ყოფილა მიღებული.

სტრასბურგში საქართველო - ევროკავშირის საპარლამენტო ასოცირების კომიტეტის სხდომა დასრულდა. დეპუტატებმა, ერთობლივი დეკლარაციის მიღება ვერ შეძლეს. ეს არის დოკუმენტი, სადაც ევროკავშირისა და საქართველოს ურთიერთობაზე, ასოცირების ხელშეკრულებით ნაკისრი ვალდებულებების შესრულებასა და მიმდინარე პოლიტიკურ პროცესებზეა საუბარი, თუმცა, დღეს ერთობლივი განცხადება ვერ მიიღეს.