სტრასბურგში ევროკავშირ-საქართველოს ასოცირების კომიტეტის სხდომა დეკლარაციის მიღების გარეშე დასრულდა

სტრასბურგში საქართველო - ევროკავშირის საპარლამენტო ასოცირების კომიტეტის სხდომა დასრულდა. დეპუტატებმა, ერთობლივი დეკლარაციის მიღება ვერ შეძლეს. ეს არის დოკუმენტი, რომელშიც ევროკავშირისა და საქართველოს ურთიერთობაზე, ასოცირების ხელშეკრულებით ნაკისრი ვალდებულებების შესრულებასა და მიმდინარე პოლიტიკურ პროცესებზეა საუბარი, თუმცა დღეს ერთობლივი განცხადება ვერ მიიღეს.

ამ საკითხის შესახებ Facebook-ზე ვიდეომიმართვა გაავრცელა სტრასბურგში მყოფმა „ევროპული საქართველოს“ წევრმა ოთარ კახიძემ.  

„ჩვენი ცვლილებები ეხებოდა პოლიტიკურ დევნას, გიგი უგულავას ბოლოდროინდელ საქმეს, მედიის მფლობელების წინააღმდეგ მიმდინარე საქმეებს. მათ შორის ნიკა გვარამია, გიორგი რურუა, ავთანდილ წერეთელი. ასევე იყო 20 ივნისის ამბები; რა თქმა უნდა, ძალის გამოყენება პოლიციის მხრიდან; სასამართლოში მიმდინარე ძალიან მძიმე პროცესები.

მნიშვნელოვანი იყო, რომ ევროპარლამენტარების უმრავლესობამ დაუჭირა მხარი ჩვენს ყველა ცვლილებას. ჩვენი ცვლილებების ჩაგდების შემდეგ, „ქართულმა ოცნებამ“ დააყენა თავისი ცვლილებები. ყველა ამ ცვლილებას ევროპარლამენტმა უარით უპასუხა. 

შემდეგ დაიწყო ევროპარლამენტარების მიერ მომზადებული ცვლილებების განხილვა და ეს ცვლილებებიც ჩაუგდეს. შემდეგ უკვე, საბოლოო ტექსტის დამტკიცებაზე ევროპარლამენტარებმა უთხრეს უარი და ეს არის უპრეცედენტო ამბავი, ჩვენი დიდი გამარჯვება და სრული დიპლომატიური კრახი „ქართული ოცნების“, - განაცხადა ოთარ კახიძე ვიდეომიმართვაში.