დავით ზალკალიანი: მიუნხენის კონფერენციაზე ითქვა, რომ საქართველოს ტერიტორიული მთლიანობის ხელყოფა საფრთხეს უქმნის მთლიანად ევროპულ უსაფრთხოებას

საქართველოს საგარეო საქმეთა მინისტრმა მიუნხენის კონფერენციაზე საქართველოს დელეგაციის მონაწილეობა შეაჯამა.

დავით ზალკალიანის შეფასებით, მიუნხენის უსფრთხოების 56-ე  კონფერენციის ფარგლებში საქართველოს დელეგაცია აქტიურად წარმოჩინდა.

ამასთან, საქართველოს საკითხზე ისაუბრეს კონფერენციის მაღალი ტრიბუნიდან, ისეთი მაღალი დონის მონაწილეებმა, როგორიც აშშ-ის სახელმწიფო მდივანი, თურქეთის საგარეო უწყების ხელმძღვანელი და კონფერენციის ორგანიზატორი არიან.

დავით ზალკალიანის თქმით, მიუნხენის კონფერენციაზე აქტიურად მიმდინარეობდა საუბარი ქვეყნის მთავარ გამოწვევაზე, რაც ჩვენი ტერიტორიების ოკუპაციას უკავშირდება. 

„მიუნხენის კონფერენციაზე, ამ მაღალი ტრიბუნიდან საქართველო რამდენჯერმე გაჟღერდა სწორედ იმ კონტექსტში, რომ ჩვენი დარღვეული ტერიტორიული მთლიანობა საფრთხეს უქმნის მთლიანად ევროპულ უსაფრთხოებას, უკრაინასთან ერთად.

მე ამ თემაზე ასევე ძალიან აქტიური საუბარი მქონდა იმ პანელზე, რომელსაც ვესწრებოდი და რომელიც იყო შავი ზღვის უსაფრთხოებაზე ფოკუსირებული. ასევე, მაქსიმალურად იყო გამოყენებული ყველა ფორმატი, ყველა შეხვედრა ამისათვის“, - განაცხადა მინისტრმა.

მან მაღალი შეფასება მისცა კონფერენციის ფარგლებში გერმანელ პარტნიორებთან შეხვედრას, მათ შორის გერმანიის ბუნდესტაგის ვიცეპრეზიდენტთან, გერმანიის ფედერალური მთავრობის წარმომადგენელთან და გერმანიის საგარეო საქმეთა სამინისტროს პოლიტიკურ დირექტორთან.

„ჩვენ ვისაუბრეთ ყველა იმ გამოწვევაზე, რომელიც ჩვენი ქვეყნისთვის არის აქტუალური. განსაკუთრებული აქცენტები, რასაკვირველია ოკუპირებულ ტერიტორიებზე არსებულ სიტუაციას დაეთმო. ჩვენთვის ძალიან მნიშვნელოვანია გერმანიის აქტიური ჩართულობა ამ პროცესში“, - განაცხადა დავით ზალკალინმა.

საქართველოს დელეგაცია პრემიერ-მინისტრის ხელმძღვანელობით მიუნხენის საერთაშორისო კონფერენციაში მონაწილეობდა. 14-16  თებერვალს კონფერენციის ფარგლებში შეხვედრებს მართავდნენ საქართველოს საგარეო საქმეთა და თავდაცვის მინისტრები.​