ევროპარლამენტი: ნებისმიერ ევროპულ ქვეყანას, რომელიც პატივს სცემს ევროკავშირის ფასეულობებს, შეუძლია განაცხადი გააკეთოს ევროკავშირში გაწევრიანებაზე

ქვეყნებს, რომლებიც ზომებს იღებენ ევროკავშირის ხელშეკრულების 49-ე მუხლის დასაკმაყოფილებლად, ევროკავშირში გაწევრიანების უფლება უნდა ჰქონდეთ - აღმოსავლეთ პარტნიორობის სამიტისთვის ევროპარლამენტი ევროკავშირის საბჭოს, კომისიას და საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს რეკომენდაციების პროექტით მიმართავს.

ეს რეკომენდაციები აღმოსავლეთ პარტნიორობის ივნისის სამიტისთვის არის განკუთვნილი. 

დოკუმენტში, რომლის ავტორი ევროპარლამენტარი პეტრას აუსტრევიჩიუსია, აღნიშნულია, რომ ევროკავშირმა უნდა აღიაროს, რომ იმ ქვეყნებს, რომლებიც ყოვლისმომცველ რეფორმებს ატარებენ და ზომებს იღებენ, რომ დააკმაყოფილონ ევროკავშირის ხელშეკრულების 49-ე მუხლის კრიტერიუმები, ევროკავშირში გაწევრიანების უფლება უნდა ჰქონდეთ ეტაპობრივი ინტეგრაციის მეშვეობით.

ევროკავშირის ხელშეკრულების 49-ე მუხლის მიხედვით, ნებისმიერ ევროპულ ქვეყანას, რომელიც პატივს სცემს ევროკავშირის ფასეულობებს, შეუძლია განაცხადი გააკეთოს ევროკავშირში გაწევრიანებაზე.

დოკუმენტში ასევე ნათქვამია, რომ ევროკავშირმა უნდა აღიაროს აღმოსავლეთ პარტნიორობის დაწინაურებული ქვეყნების ასოცირებული პარტნიორობის სტატუსი, კერძოდ იმ ქვეყნების, რომლებმაც ხელი მოაწერეს ასოცირების ხელშეკრულებასა და ღრმა და ყოვლისმომცველი თავისუფალი სავაჭრო სივრცის შესახებ შეთანხმებას, რომ დაკმაყოფილებული იყოს ორმხრივი საჭიროება პოლიტიკური დიალოგისთვის, შემდგომი ეკონომიკური თანამშრომლობისა და საკანონმდებლო ჰარმონიზაციისთვის.

დოკუმენტში ყურადღებაა გამახვილებული დამოუკიდებელი და ეფექტური ინსტიტუტების გაძლიერებაზე ცენტრალურ და ადგილობრივ დონეზე, დეოლიგარქიზაციაზე და კორუფციისა და სახელმწიფოს მიტაცების წინააღმდეგ ბრძოლაზე.

ევროპარლამენტი ევროკავშირის საბჭოს, კომისიას და საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს რეკომენდაციების პროექტში მოუწოდებს, ხელი შეუწყოს აღმოსავლეთ პარტნიორობის ქვეყნებში საარჩევნო პროცესის საერთაშორისო სტანდარტებთან, ეუთოსა და ვენეციის კომისიის რეკომენდაციებთან სრულ შესაბამისობაში ჩატარებას.