პეტრას აუსტრევიჩიუსი: ასოცირებული ქვეყნებისთვის ევროპის საერთო ბაზარი და სხვა ძალიან ბევრი რამ უნდა გაიხსნას

სახელმწიფოები, რომლებსაც ევროკავშირთან ასოცირების ხელშეკრულება აქვთ გაფორმებული და რომლებიც გარკვეულ კრიტერიუმებს აკმაყოფილებენ ევროპის საერთო ბაზრით, მწვანე შეთანხმებით ციფრული კავშირით და ენერგოკავშირით უნდა სარგებლობდნენ, - ამის შესახებ ევროპარლამენტარმა პეტრას აუსტრევიჩიუსმა ტელეკომპანია „იმედს“ განუცხადა. მისი თქმით, პარტნიორების ინტეგრაციას დრო დასჭირდება, რომელიც ბრიუსელმა საქართველოს, უკრაინის და მოლდოვის მოსამზადებლად უნდა გამოიყენოს.

„მე ვგულისხმობ ასოცირებული ქვეყნებისთვის ევროპის საერთო ბაზრის, მწვანე შეთანხმების, ციფრული კავშირის, ენერგო კავშირის და სხვა ძალიან ბევრი რამ უნდა გაიხსნას პარტნიორებისთვის, რომლებიც აკმაყოფილებენ კრიტერიუმებს და გვაჩვენებენ, რომ შეუძლიათ ამ პასუხისმგებლობას გაუმკლავდნენ. სექტორულ დონეზე ჩვენი ასოცირებული პარტნიორების ინტეგრაცია საჭიროა, აუცილებელია, სასარგებლოა და მნიშვნელოვანი. ეს არის ჩვენი უმთავრესი ინსტრუმენტი. მერწმუნეთ, ერთიანი ბაზარი არის ტრასფორმაციისთვის ყველაზე ძლიერი ინსტრუმენტი. ეს იმაზე მეტია ვიდრე, ფინანსური დახმარება, საკანონმდებლო ბაზის ჰარმონიზაცია. ეს ხელს უწყობს ქვეყნის ეკონომიკის ტრასფორმაციას. მე ველოდები მსჯელობას ამ თემაზე პოლიტიკურ ჯგუფებთან. მინდა წარმოვადგინოთ მრავალფეროვანი კონცეფცია, რომელსაც ასე დავარქმევდი - პარტნიორობიდან ინტეგრაციამდე. დიახ, ინტეგრაციას დასჭირდება დრო. დროა საჭირო ქვეყნების მოსამზადებლად ორგანიზაციაში გაწევრიანებისთვის. გულწრფელად ვთქვათ, რომ ახლა დასავლეთ ბალკანეთის ქვეყნების დროა, რათა მათი ორგანიზაციაში ინტეგრაცია მოხდეს. ჩემი აზრით, ეს დრო უნდა გამოვიყენოთ საქართველოსთვის, უკრაინისთვის და მოლდოვასთვის. მათ მოსამზადებლად და უფრო მეტი სექტორული ინტეგრაციისთვის. ეს მოუტანს ასოცირებულ ქვეყნებს პოზიტიურ შედეგებს“, - განაცხადა ევროპარლამენტარმა.

აუსტრევიჩიუსმა აღმოსავლეთ პარტნიორობის პროგრამის მნიშვნელობაზეც ისაუბრა და აღნიშნა, რომ ამ ინიციატივამ ქვეყნები გარდაქმნა. 

„ჩვენ ვაღიარებთ, რომ აღმოსავლეთ პარტნიორობა არის წარმატებული ინიციატივა და ჩვენი საერთო წარმატებული ისტორია. ეს არის ინიციატივა, რომელმაც გარდაქმნა ქვეყნები. ამ ინიციატივამ მოახდინა განსაკუთრებით ასოცირებული სახელმწიფოების საქართველოს, უკრაინის და მოლდოვას ტრასფორმაცია და ხელი შეუწყო აზერბაიჯანისა და სომხეთის წინსვლას. ინიციატივა დაეხმარა მათ რეფორმების გატარებაში და ხელი შეუწყო ამ ქვეყნების თანამედროვე სახელმწიფოებად ჩამოყალიბებას“, - განაცხადა აუსტრევიჩიუსმა.

თუმცა, მისი თქმით, ქვეყნებს, რომლებსაც რეფორმების განხორციელება და ევროკავშირის წევრობა სურთ მეტი ინტეგრაციის საშუალება უნდა მიეცეთ.

„ჩვენ ვაგრძელებთ კანონების თვალსაზრისით ჰარმონიზაციის პროცესს, მაგრამ ჩვენ ღრმად გვწამს, რომ ეს არ არის საკმარისი. ქვეყნებს, რომლებსაც სურთ უფრო მეტი, მიზნად აქვთ დასახული მომავალში გაწევრიანება, მზად არიან რეფორმებისთვის, შეუძლიათ რეფორმების განხორციელება და ამ მზაობის დემონსტრირებას ახდენენ, მათ აუცილებელია გზა გავუხსნათ. მათთვის უფრო მეტი შესაძლებლობა უნდა იყოს ხელმისაწვდომი. ამ ქვეყნებს უნდა მივცეთ საშუალება მეტი და მეტი ინტეგრაციის“, - განაცხადა ევროპარლამენტარმა. 

აღმოსავლეთ პარტნიორობის სამიტისთვის ევროპარლამენტმა ევროკავშირის საბჭოს, კომისიას და საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს რეკომენდაციების პროექტით მიმართა, რომელიც პეტრას აუსტრევიჩიუსმა მოამზადა. აღმოსავლეთ პარტნიორობის სამიტი ბრიუსელში მიმდინარე წლის ივნისში გაიმართება.