შოთა უტიაშვილი: დარწმუნებული ვარ, რომ ვანო მერაბიშვილი პოლიტიკური ბრძოლის გზით ხელისუფლების შეცვლაში წვლილს შეიტანს

შოთა უტიაშვილი დარწმუნებულია, რომ ვაო მერაბიშვილი პოლიტიკური ბრძოლის გზით ხელისუფლების შეცვლაში წვლილს შეიტანს. 

ამის შესახებ შსს-ს ანალიტიკური დეპარტამენტის ყოფილმა უფროსმა ჟურნალისტებს ექსპრემიერის სახლთან განუცხადა, სადაც ექსპრემიერის მიერ საპატიმროს დატოვების შემდეგ, ოპოზიციის წარმომადგენლები მიდიან. 

„მოვედი, რომ ვნახო, 7 წელია, არ მინახავს, ჩემი ახლო მეგობარია და მინდა, ვნახო. მოვიკითხო, მივულოცო. მერე პოლიტიკაზე საუბრის დროც გვექნება“, - აღნიშნა უტიაშვილმა. 

რაც შეეხება პოლიტიკური გეგმებს, შოთა უტიაშვილის თქმით, "ვანო მერაბიშვილი 7 წელი იჯდა სამარტოო საკანში და დრო სჭირდება, რომ გაერკვეს". 

თითქმის 7-წლიანი პატიმრობის შემდეგ ექსპრემიერმა და შინაგან საქმეთა ყოფილმა მინისტრმა, ვანო მერაბიშვილმა ე.წ. მატროსოვის ციხე დატოვა. საპატიმროსთან მას მხარდამჭერები დახვდნენ.

2013 წელს დაკავებული შინაგან საქმეთა ყოფილი მინისტრი სასჯელს რამდენიმე საქმეზე იხდიდა, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე. 7 ნოემბრის აქციის დარბევისა და „ტელეიმედში“ შეჭრის საქმეების განხილვა ამ დრომდე გრძელდება და ბრალდების რიგით მეექვსე საქმეზე განაჩენი მალევე უნდა გამოცხადდეს.