ირაკლი სესიაშვილი: მერაბიშვილი ციხიდან ჯერ არ გამოსულა და უკვე დამხობაზე გველაპარაკება

ვურჩევ გიგა ბოკერიას, რომელიც მერაბიშვილის მეგობარია, აუხსნას, რომ აღარ ცხოვრობს იმ ქვეყანაში, სადაც დამხობა ან გვამების მოთხოვნა შეიძლება, - ასე გამოეხმაურა თავდაცვისა და უშიშროების კომიტეტის თავმჯდომარე, ირაკლი სესიაშვილი ვანო მერაბიშვილის განცხადებებს, რომელიც მან სასჯელაღსრულების დაწესებულების დატოვების შემდეგ გააკეთა.

მისი თქმით, ქართველ ხალხს არ დავიწყებია ის დანაშაულები, რაც მერაბიშვილს სააკაშვილის დავალებით  აქვს ჩადენილი.

"მერაბიშვილი ციხიდან ჯერ არ გამოსულა და უკვე დამხობაზე გველაპარაკება. ცხადია, ქართველ ხალხს არ დავიწყებია ის დანაშაულები, რაც ბატონმა მერაბიშვილმა თავისი სააკაშვილის ხელმძღვანელობით ჩაიდინა. იგივე გირგვლიანის საქმის გაყალბება," იმედის" ქონების მიტაცება, გელაშვილის ცემის ფაქტი და ა.შ. სამწუხაროდ, მათ არ აქვთ განცდა, რომ დანაშაულები ჩაიდინეს და ამ დანაშაულებზე ელემენტარულად, ბოდიში მოიხადონ და ქართულ საზოგადოებას თვალებში ჩახედონ", - განაცხადა სესიაშვილმა.

ირაკლი სესიაშვილის თქმით, იმ დანაშაულებს, რაც სააკაშვილის რეჟიმმა მთავარი შემოქმედის მონაწილეობით ჩაიდინა ქართველი ხალხის წინაშე, ხალხი ვერ დაივიწყებს. მეტიც, მათ ამ დანაშაულების განცდის უნარი და მზაობა არ აქვთ.

„ცხადია, ისინი ექცევიან ისევ იმ გარემოსა და პოლიტიკურ იდეოლოგიაში, რომლის მთავარი ხერხია როგორ დაამხონ ხელისუფლება, როგორ აურიონ სიტუაცია და დაუბრუნდნენ ძალადობას. ასეთ წარსულს არ დავუბრუნდებით! გვამების მოთხოვნის, რუსთაველზე სისხლიანი ადამიანების დაყრის და სხვა მძიმე დანაშაულების დრო და ადგილი ამ ქვეყანაში დასრულდა!", - განაცხადა სესიაშვილმა.

ამ ხელისუფლების დამხობის მერე ციხის კარი გაიღება და ყველა პოლიტპატიმარი გათავისუფლდება, - ამის შესახებ ვანო მერაბიშვილმა 20 თებერვალს საპატიმროს დატოვების შემდეგ განაცხადა. 

ვანო მერაბიშვილმა სასჯელაღსრულების დაწესებულება 20 თებერვალს დატოვა.

შინაგან საქმეთა ყოფილი მინისტრი სასჯელს რამდენიმე საქმეზე იხდიდა, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე. 7 ნოემბრის აქციის დარბევისა და „ტელეიმედში“ შეჭრის საქმეების განხილვა ამ დრომდე გრძელდება და ბრალდების რიგით მეექვსე საქმეზე განაჩენი მალევე უნდა გამოცხადდეს.