ირაკლი ბერაია: დიდი ხანია დასრულდა ის დრო, როდესაც ამ ქვეყანაში ვანო მერაბიშვილის ვინმეს ეშინოდა

რაც შეეხება ვანო მერაბიშვილის განცხადებებს ხელისუფლების დამხობასთან დაკავშირებით, ყველამ ძალიან კარგად იცის, რომ ის სახელმწიფო ტერორიზმის მანქანის ერთ-ერთი მთავარი შემოქმედი და არქიტექტორია - ამის შესახებ „ქრონიკას“ პარლამენტის საგარეო ურთიერთობათა კომიტეტის თავმჯდომარემ, ირაკლი ბერაიამ განუცხადა. 

მისის თქმით, ქვეყანაში არანაირი პოლიტიკური პატიმრები არ არსებობენ და საქართველოში პოლიტიკური ნიშნით არავინ იდევნება. დეპუტატის განცხადებით, მმართველმა ძალამ წინა ხელისუფლების დროინდელი მანკიერი პრაქტიკა დაასრულა.

„ამ ქვეყანას და მის მოქალაქეებს ძალიან კარგად ახსოვთ, თუ რა დაუჯდა ჩვენს სახელმწიფოს მისი ხელისუფლებაში მართვის სადაავეებთან და პოლიტიკაში ყოფნა. ვანო მერაბიშვილი აგრძელებს თავისთვის დამახასიათებელ აგრესიულ ნარატივს. ეს ძალიან კარგად მეტყველებს იმაზე, რომ ამ ადამიანებისთვის ძალიან უცხოა სამართლებრივი სახელმწიფოს პრინციპები და მათთვის მიუღებელია დემოკრატიული ფასეულობები. ერთადერთი გარემო, სადაც ისინი საკუთარ თავს კომფორტულად ხედავენ არის რადიკალური ქმედებები და დამხობის გზით სიარული“, - აცხადებს ბერაია. 

დეპუტატის თქმით, როგორც პასუხისმგებლიანი ხელისუფლება დამხობას არ და ვერ დაუშვებენ. „დიდი ხანია დასრულდა ის დრო, როდესაც ამ ქვეყანაში ვანო მერაბიშვილის ვინმეს ეშინოდა. დესტრუქციული ოპოზიციის რიგებში ერთის ნაცვლად ათი ვანო მერაბიშვილის დამატებაც ვერ შეცვლის საქართველოს დემოკრატიულ დღის წესრიგს“, - აღნიშნა ირაკლი ბერაიამ. 

ამ ხელისუფლების დამხობის მერე ციხის კარი გაიღება და ყველა პოლიტპატიმარი გათავისუფლდება, - ამის შესახებ ვანო მერაბიშვილმა 20 თებერვალს საპატიმროს დატოვების შემდეგ განაცხადა. 

ვანო მერაბიშვილმა სასჯელაღსრულების დაწესებულება 20 თებერვალს დატოვა.

შინაგან საქმეთა ყოფილი მინისტრი სასჯელს რამდენიმე საქმეზე იხდიდა, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე. 7 ნოემბრის აქციის დარბევისა და „ტელეიმედში“ შეჭრის საქმეების განხილვა ამ დრომდე გრძელდება და ბრალდების რიგით მეექვსე საქმეზე განაჩენი მალევე უნდა გამოცხადდეს.