ვიქტორ ყიფიანი: კარგი გზავნილია, რომ საქართველოს კიბერუსაფრთხოების განვითარებაში აშშ ქმედით მონაწილეობას მიიღებს

კიბერშეტევები არის ბოლო დროინდელი ტაქტიკა. რუსეთი ცდილობს თავი დაიმკვიდროს, როგორც გლობალურმა ზესახელმწიფომ. ეს კიბერშეტავა მაღალი ალბათობით უნდა ითქვას, რომ არც პირველია და არც უკანასკნელი, -. ამის შესახებ კომპანია „ჯეოქსის“ თავმჯდომარე ვიქტორ ყიფიანმა ტელეკომპანია „იმედის“ გადაცემა „დღის ქრონიკაში“ განაცხადა.

მისი თქმით, რუსეთს რამდენიმე წითელი ხაზი აქვს მონიშნული და ერთ-ერთი მიზანი არის ახლო საზღვარგარეთში მათი პრივილეგირებული ინტერესების გავრცელება. „ახლო საზღვარგარეთში სამწუხაროდ შევდივართ ჩვენ და ამ კიბერშეტევის განხორციელებით, რუსეთი ერთგვარად მონიშვნას აკეთებს მისი გავლენის გეოგრაფიის. ის გზავნილს უგზავნის დასავლეთს, რომ ეს არის მისი განსაკუთრებული ინტრესების ზონა. რეალურად მზად არის დაკმაყოფილდეს მცირედით. რომ ყოფილ პოსტსაბჭოთა ქვეყნებში შეინარჩუნოს თავისი გავლენა“, - განაცხადა ვიქტორ ყიფიანმა.

მისი თქმით, რუსული მიდგომა ერთი შეხედვით შეიძლება არის სწორხაზოვანი, მაგრამ ამავდროულად საკმაოდ იმპროვიზირებულიც. „რუსეთი ცდილობს ნაკლები რისკით და დანახარჯით, რაც არაკონვენციურ სიბრტყეში დასავლეთთან დაპირისპირებას შეეხება, განავითაროს საკუთარი გავლენა, შეტევა და ინიციატივა იქ, სადაც მას ხელეწიფება. სადაც სისტემა მოწყვლადია, ან დასავლეთი არ არის მზად, რომ ჩაერიოს და შესაბამისად რუსეთს თავისი გზავნილი გაუგზავნოს ამ წითელ ზონებთან დაკავშირებით. ის ცდის დასავლეთს. რამდენად მზად არისდა მობილიზებულია ასეთ სიტუაციაში სიმტკიცე გამოიჩინოს“, - განაცხადა ვიქტორ ყიფიანმა.

მისი თქმით საკმაოდ კარგი გზავნილია, რომ საქართველოს კიბერუსაფრთხოების განვითარებაში აშშ მიიღებს ქმედით მონაწილეობას. „კიბერუსაფრთხოება არის დიდი ფუფუნება და ჩვენ, ჩვენი რესურსებით, ამ საკითხს ვერ გადავწყვეტთ. ეს თანადგომა ძალიან არსებითია. ქართული თემა ისევ აღმოჩნდა ევროატლანტიკურ დღის წესრიგში. ეს არის ძალიან კარგი თანხვედრა, როცა ჩვენ გრადუსი უნდა შევინარჩუნოთ. უნდა მივიღოთ მაქსიმალური პოლიტიკური დივიდენდები შექმნილი ვითარებიდან“, - განაცხადა ვიქტორ ყიფიანმა.

2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებგვერდებზე, სერვერებსა და სხვა მართვით სისტემებზე. კიბერშეტევის შედეგად დაზიანდა ამ ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება.

გამოძიებამ დაადგინა, რომ საქართველოს პრეზიდენტისა და სხვა ოფიციალური უწყებების ვებგვერდებზე კიბერშეტევა რუსეთმა განახორციელა.

ამის შესახებ საგარეო საქმეთა სამინისტროში გამართულ ბრიფინგზე 20 თებერვალს განაცხადეს.