დავით ზალკალიანი: საგანგაშოა, რომ ოკუპირებულ რეგიონებში გაუარესებული ვითარება იძულებით გადაადგილების ახალი ტალღის გარდაუვალ საშიშროებას ქმნის

„საგანგაშოა, რომ ოკუპირებულ რეგიონებში გაუარესებული ჰუმანიტარული და ადამიანის უფლებათა კუთხით არსებული ვითარება ქმნის იძულებით გადაადგილების ახალი ტალღის გარდაუვალ საშიშროებას“, - ამის შესახებ საგარეო საქმეთა მინისტრმა, დავით ზალკალიანმა ჟენევაში, გაეროს ადამიანის უფლებათა საბჭოს მაღალი დონის სეგმენტზე სიტყვით გამოსვლისას განაცხადა.

მინისტრის განცხადებით, ოკუპირებულ რეგიონებში ქართველი მოქალაქეების სიცოცხლის ხელყოფამ მიიღო სახიფათო ტენდენციის სახე.

„ცნობილი ქართველი ექიმის, ვაჟა გაფრინდაშვილის შემთხვევა, რომელიც თითქმის ორი თვის მანძილზე, უკანონო პატიმრობაში იმყოფებოდა ე.წ. „სახელმწიფო საზღვრის“დარღვევის ბრალდებით, თავისუფალი გადაადგილებისა და უკანონო დაკავებების განგრძობითი პრაქტიკის ერთ-ერთი თვალსაჩინო მაგალითია.

მსურს გამოვიყენო ეს შესაძლებლობა და მადლობა გადავუხადო ყველა ჩვენს საერთაშორისო პარტნიორსა და ორგანიზაციას მათი ძალისხმევისთვის, რომელსაც მოჰყვა ექიმის გათავისუფლება.

ნება მომეცით, კიდევ ერთხელ შევახსენო საბჭოს, რომ ოკუპირებულ რეგიონებში ქართველი მოქალაქეების სიცოცხლის ხელყოფამ მიიღო სახიფათო ტენდენციის სახე.

2019 წლის 10 მარტს, რუსეთის ფსბ-ს ძალებმა საოკუპაციო ხაზთან დააკავეს საქართველოს მოქალაქე ირაკლი კვარაცხელია და მოგვიანებით ის გარდაიცვალა უფრო საგანგაშო ის არის, რომ ის რუსეთის მიერ ოკუპირებულ აფხაზეთში უკანონოდ განთავსებულ, რუსეთის სამხედრო ბაზაზე გარდაიცვალა.

დავით ბაშარული, გიგა ოთხოზორია და არჩილ ტატუნაშვილი  იმ ქართველთა სახელებია, რომლებიც გასული წლების მანძილზე მოკლეს. ყველაზე საგანგაშო კი ის არის, რომ ამ საშინელ დანაშაულთა ჩამდენი პირები კვლავ დაუსჯელები რჩებიან.

ამგვარი მიდგომა კიდევ უფრო ამწვავებს დაუსჯელობის შეგრძნებას, და მეტიც, ამძაფრებს ეთნიკური ქართული მოსახლეობის მიმართ ძალადობას. აქვე მინდა კიდევ ერთხელ გავუსვა ხაზი წევრი სახელმწიფოების მხრიდან „ოთხოზორია-ტატუნაშვილის სიის“ მხარდაჭერის, როგორც ოკუპირებულ ტერიტორიებზე ადამიანის უფლებების დამრღვევი პირებისათვის შემზღუდველი ზომების დაკისრების გზით, სიტუაციის შემდგომი გაუარესებისგან თავის აცილების მიზნით პრევენციული ნაბიჯის მნიშვნელობას

აფხაზეთისა და ცხინვალის რეგიონებში განხორციელებული, ეთნიკური წმენდის რამდენიმე ტალღის შედეგად, ასობით იძულებით გადაადგილებული და დევნილი პირი დღემდე მოკლებულია საკუთარ სახლში უსაფრთხო და ღირსეული დაბრუნების უფლებას.

საგანგაშოა, რომ ოკუპირებულ რეგიონებში გაუარესებული ჰუმანიტარული და ადამიანის უფლებათა კუთხით არსებული ვითარება ქმნის იძულებით გადაადგილების ახალი ტალღის გარდაუვალ საშიშროებას.

ჩვენ მტკიცედ გვჯერა, რომ პოლიტიკური გადაწყვეტილების  არარსებობა ვერ იქნება  და არ უნდა  ქმნიდეს დაბრკოლებას იმ ადამიანების ფუნდამენტური უფლებებისა და თავისუფლებების დაცვის კუთხით, რომლებიც მოკლებულნი არიან მინიმალურ უსაფრთხოების ზომებს დევნის საშიშროების პირობებში. შესაბამისად, საერთაშორისო თანამეგობრობის, პირველ რიგში კი ადამიანის უფლებათა საბჭოს, მტკიცე პოზიცია არსებითია.

ამის გათვალისწინებით, ჩვენ კვლავ ვგეგმავთ საბჭოს მიმდინარე სესიაზე რეზოლუცის-„თანამშრომლობა საქართველოსთან“ გატანას და თქვენი მხარდაჭერის იმედი გვაქვს“, - განაცხადა დავით ზალკალიანმა.