დავით ზალკალიანი ენგურში დამხრჩვალ მოქალაქეებზე: ეს ტრაგედია, განგრძობადი ოკუპაციისა და იმ უკანონო ქმედებების შედეგია, რომელსაც რუსეთის ფედერაცია ოკუპირებულ ტერიტორიებზე ახორციელებს

უკვე მომავალ კვირას დაგეგმილია შეხვედრები ევროპის საბჭოს მინისტრთა კომიტეტის მოადგილეების ფარგლებში, რომელშიც ჩემი მოადგილე მიიღებს მონაწილეობას და ძალიან მწვავედ დააყენებს ამ საკითხს, - ასე გამოეხმაურა საქართველოს საგარეო საქმეთა მინისტრი, დავით ზალკალიანი საოკუპაციო რეჟიმის გამო გალელი მოქალაქეების გარდაცვალების ფაქტს.

მინისტრის თქმით, ეს ტრაგედია, განგრძობადი ოკუპაციისა და იმ უკანონო ქმედებების შედეგია, რომელსაც რუსეთის ფედერაცია ოკუპირებულ ტერიტორიებზე ახორციელებს.

„პირველ რიგში სამძიმარი მინდა გამოვუცხადო გარდაცვლილების ოჯახებს და აღვნიშნო, რომ ეს არის ტრაგედია, განგრძობადი ოკუპაციისა და იმ უკანონო ქმედებების შედეგი, რომელსაც რუსეთის ფედერაცია ახორციელებს ოკუპირებულ ტერიტორიებზე. სამწუხაროდ, ადამიანის ფუნდამენტური უფლება, რაც არის დაკავშირებული თავისუფალ გადაადგილებასთან, არის შელახული. ეს არის ის საკითხი, რომელსაც ყველა საერთაშორისო ფორმატის ფარგლებში ვაყენებთ. პირველ რიგში ეს არის ჟენევის მოლაპარაკებების ფორმატი.

ოკუპირებულ ტერიტორიებზე საერთაშორისო უსაფრთხოების მექანიზმის შექმნა არის უმთავრესი პრიორიტეტი, რომელიც მუდმივად არის ჩვენს და ასევე ყველა საერთაშორისო ორგანიზაციის დღის წესრიგში. ჩვენ ვართ თანმიმდევრული ჩვენი სამშვიდობო პოლიტიკის მიმართ, მაგრამ ეს არ ნიშნავს, რომ მოდუნებული გვაქვს ყურადღება რუსეთის ფედერაციის უკანონო ქმედებასთან და მათ მიერ შეუსრულებელ ვალდებულებებთან მიმართებით. რა თქმა უნდა ჟენევის პროცესი, რომელიც სამ ძირითად ფუნდამენტზეა დაფუძნებული: 2008 წლის ცეცხლის შეწყვეტის შეთანხმება, საერთაშორისო უსაფრთხოების მექანიზმების შექმნა, რომელიც მოიცავს ადამიანის ფუნდამენტური უფლებების, ასევე იძულებით გადაადგილებულ პირთა დაბრუნებას, ყველა ეს ძირითადი პრინციპი და საფუძველი ჟენევის მოლაპარაკებების არის შეუსრულებელი ერთადერთი ძალის - რუსეთის ფედერაციის მიერ.

ჩვენ მუდმივად ყველა საერთაშორისო ფორმატის ფარგლებში, იქნება ეს ეუთო, ევროკავშირი, გაერო, ევროპის საბჭოს მინისტრთა კაბინეტის სხდომები, ყველა ფორმატს ვიყენებთ იმისთვის, რომ გაიზარდოს წნეხი რუსეთს ფედერაციაზე. მთლიანად ის, რომ ევროპული უსაფრთხოება არის დარღვეული, არის შედეგი, რომ რუსეთი საერთოდ არ ითვალისწინებს საერთაშორისო სამართლის ნორმებს, პრინციპებსა და ნაკისრი ვალდებულებების შესრულების საკითხს. მთელი კრიზისი ევროპის უსაფრთხოების არამხოლოდ საქართველოსთან მიმართებაში, არამედ უკრაინასთან და მოლდოვასთან მიმართებაში არის დაკ ავშირებული ერთი ქვეყნის მხრიდან შეუსრულებელ ვალდებულებებთან. ამას მარტო ვერ გავუმკლავდებით, საჭიროა საერთაშორისო თანამეგობრობის კონსოლიდაცია, რასაც მუდმივად ვაკეთებთ. ამ შემთხვევასთან მიმართებაშიც ყველა ფორმატს მაქსიმალურად გამოვიყენებთ.

უკვე მომავალ კვირას დაგეგმილია შეხვედრები ევროპის საბჭოს მინისტრთა კომიტეტის მოადგილეების ფარგლებში, რომელშიც ჩემი მოადგილე მიიღებს მონაწილეობას და ძალიან მწვავედ დააყენებს ამ საკითხს იმისათვის, რომ რუსეთის ფედერაციას კიდევ ერთხე ლ მოუწოდოს საერთაშორისო თანამეგობრობამ ჩაკეტილი გამშვები პუნქტების გახსნისკენ. ჰქონდეს მოსახლეობას წვდომა, რომ მიიღოს განათლება, ჯანდაცვის მომსახურება, მედიკამენტები. ეს მექანიზმი იქნება ძალიან აქტიური. ასევე მომავალ კვირას ეუთოს მუდმივმოქმედი საბჭოს ფორმატშიც იქნება ჩვენი დელეგაციის მხრიდან ეს საკითხი მკაფიოდ და მწვავედ დაყენებული. ჩვენ არ მივცემთ მათ საშუალებას, რომ კვლავაც გააგრძელონ ეს უკანონო ქმედება და გამოვიყენებთ ყველა მექანიზმს იმისთვის, რომ რუსეთზე გაიზარდოს ზეწოლა, რადგანაც ელემენტარული უფლება, რაც არის დაკავში რებული თავისუფალ გადაადგილებასთან, იყოს უზრუნველყოფილი“, - განაცხადა ზალკალიანმა.

7 აპრილს, საოკუპაციო ხაზთან, ქართული მხარის მიერ კონტროლირებად ტერიტორიაზე მდინარე ენგურმა 4 ცხედარი გამორიყა. გარდაცვლილების ნათესავების ინფორმაციით, გალის მკვიდრები სხვადასხვა საჭიროებისთვის, შემოვლითი გზით ცდილობდნენ ზუგდიდში გადმოსვლას, რა დროსაც სავარაუდოდ, მდინარე ადიდდა და ოთხივე დინებამ გაიტაცა.