გრიგოლ ვაშაძე: ოპოზიციისთვის დიალოგის დაწყება მორალურად მძიმე იყო

პროპორციული არჩევნები, პოლიტიკური დევნის შეყვეტა, საქმეების დახურვა და პოლიტპატიმრების გათავისუფლება, ამის გარეშე ყოველგვარი დიალოგი წარმოუდგენელია, - ამის შესახებ ჟურნალისტებთან „ნაციონალური მოძრაობის“ თავმჯდომარემ, გრიგოლ ვაშაძემ განაცხადა.

„მორალურად, ამ დიალოგის დაწყება ძალიან მძიმე იყო, მაგრამ მას შემდეგ, რაც ყველას მაგიდიდან ააცალეს გიგი უგულავა და ოპოზიციაში საფუძვლიანი ეჭვი არსებობს, რომ ეს ბოლო დაპატიმრება არ არის, ბოდიში, მაგრამ რა დიალოგზე შეიძლება ვილაპარაკოთ? ხელისუფლებას შეთითხნილი ბრალდებებით ადამიანის ციხეში შეგდება არ გაუჭირდება. გიგი უგულავამ ამ საქმეზე ერთი ვადა უკვე მოიხადა. ისეთი პრეცედენტი არ არსებობს, როცა ადამიანს ერთსა და იმავე საქმეზე ორჯერ მოუწიოს ციხეში წასვლა. ვანო მერაბიშვილი პოლიტპატიმარი იყო, შეთითხნილი ბრალდებით, მაგრამ ადამიანმა თავისი პატიმრობის ვადა მოიხადა, რაც ე.წ. სასამართლომ განუსაზღვრა. ახლა საზოგადოების წინაშე ყველა სამართლებრივი თვალსაზრისით აბსოლუტურად სუფთაა“, - განაცხადა ვაშაძემ.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.